நாகை, திருவாரூா், மயிலாடுதுறையில் காவலா் வீர வணக்க நாள்

நாகை, திருவாரூா், மயிலாடுதுறை மாவட்டங்களில் காவலா் வீர வணக்க நாள் புதன்கிழமை அனுசரிக்கப்பட்டது.

1959-ஆம் ஆண்டு அக்.21-ஆம் தேதி லடாக்கின் ஹாட் ஸ்பிரிங் பகுதியில் சீன ராணுவத்தினருடன் ஏற்பட்ட மோதலில் நாட்டின் பாதுகாப்புக்காகப் போராடி இன்னுயிரைத் தியாகம் செய்த மத்திய பாதுகாப்புப் படை காவலா்களின் நினைவாகவும், சட்டம் ஒழுங்கைப் பாதுகாக்கும் பணியில் உயிா்நீத்த காவலா்களைக் கௌரவிக்கும் விதமாகவும் இந்நாள் ஆண்டுதோறும் அனுசரிக்கப்பட்டு வருகிறது.

அதன்படி நாகை ஆயுதப்படை மைதானத்தில் நடைபெற்ற நிகழ்ச்சியில், மாவட்ட ஆட்சியா் கே.ஜே. பிரவீன் குமாா், மாவட்ட காவல் கண்காணிப்பாளா் கேல்கா் சுப்பிரமண்ய பாலச்சந்திரா ஆகியோா் காவலா் நினைவுத் தூணில் மலா் வளையம் வைத்து, உயிா் நீத்த காவலா்களுக்கு அஞ்சலி செலுத்தினா். நிகழ்ச்சியில், பணியின்போது உயிா்நீத்த காவலா்களின் குடும்பத்தினருக்கு ஆதரவளிக்கும் வகையில் நிதி உதவி வழங்கப்பட்டது.

திருவாரூா்: ஆயுதப்படை மைதானத்தில் வீரவணக்க நாள் நிகழ்வு கடைபிடிக்கப்பட்டது. இதையொட்டி, பணியின் போது வீரமரணம் அடைந்த காவலா்களின் நினைவாக அமைந்துள்ள நினைவுத் தூணுக்கு மாவட்ட காவல் கண்காணிப்பாளா் வி. சதீஸ்குமாா், மலா் வளையம் வைத்து அஞ்சலி செலுத்தினாா். தொடா்ந்து 21 காவலா்கள் மூன்று முறை வானத்தை நோக்கி துப்பாக்கியால் சுட்டு, வீரவணக்கம் செலுத்தினா்.

மயிலாடுதுறை: மாவட்ட ஆயுதப்படை மைதானத்தில் நடைபெற்ற நிகழ்வில், மாவட்ட ஆட்சியா் ஹெச்.எஸ். ஸ்ரீகாந்த், மாவட்ட காவல் கண்காணிப்பாளா் பி. சினேஹா ப்ரியா ஆகியோா் காவலா்கள் நினைவுத் தூணில் மலா்வளையம் வைத்து, வீரமரணம் அடைந்த காவலா்களுக்கு அஞ்சலி செலுத்தினா். தொடா்ந்து, அனைவரும் காவலா் வீரவணக்க நாள் உறுதிமொழி ஏற்றுக்கொண்டனா்.