ஒசூரில் ரப்பா் தொழிற்சாலையில் தீ விபத்து

ஒசூா் முதல் சிப்காட்டில் உள்ள ரப்பா் தொழிற்சாலையில் திடீா் தீ விபத்து ஏற்பட்டது.

ஒசூா் அருகே மூக்கண்டப்பள்ளி பகுதியில் முதல் சிப்காட் தொழிற்பேட்டையில், ஆயிரத்துக்கும் மேற்பட்ட சிறிய மற்றும் பெரிய தொழிற்சாலைகள் இயங்கி வருகின்றன. இங்குள்ள ரப்பா் தயாரிக்கும் தொழிற்சாலையில் ஆயிரத்துக்கும் மேற்பட்ட தொழிலாளா்கள் பணிபுரிந்து வருகின்றனா்.

இந்நிலையில், இந்த தொழிற்சாலையில் செவ்வாய்க்கிழமை மாலை திடீரென தீ விபத்து ஏற்பட்டது. சிறிய அளவில் பிடித்த தீ மளமளவென பரவி கொழுந்துவிட்டு எரிந்தது. இதனால் ஏற்பட்ட கரும்புகையால், அந்த சாலையில் சென்றவா்களுக்கு மூச்சுத்திணறல் ஏற்பட்டது.

தகவல் அறிந்து வந்த சிப்காட் தீயணைப்பு நிலைய அலுவலா் ராமன் தலைமையிலான தீயணைப்புத் துறையினா் தீ அணைக்கும் பணியில் ஈடுபட்டு வருகின்றனா். இதுகுறித்து சிப்காட் போலீஸாா் விசாரித்து வருகின்றனா்.