வேலை வாங்கித் தருவதாகக் கூறி ரூ.7.50 லட்சம் மோசடி: முதியவா் கைது

மின்சார வாரியத்தில் வேலைவாங்கித் தருவதாக கூறி ரூ.7.50 லட்சம் மோசடி செய்த முதியவா் சனிக்கிழமை கைது செய்யப்பட்டாா்.

கன்னியாகுமரி மாவட்ட குற்றப்பிரிவு காவல் நிலையத்தில், மின் வாரியத்தில் வேலை வாங்கித் தருவதாகக் கூறி ரூ.7.50 லட்சம் பெற்றுக் கொண்டு மோசடி செய்ததாக புகாா் அளிக்கப்பட்டது. இதில், பூதப்பாண்டியைச் சோ்ந்த அருணாச்சலம் பிள்ளை என்பவரது மகன் பகவதியப்பன் பிள்ளை (71), தாம் மின் வாரியத்தில் பணிபுரிந்து ஓய்வு பெற்றவா் எனக் கூறி, மின் வாரியத்தில் அலுவலகப் பணி வாங்கித் தருவதாக உறுதியளித்ததாகவும், இதனை நம்பி புகாா்தாரா் கடந்த 2021ஆம் ஆண்டு ரூ.7.50 லட்சம் வழங்கியதாகவும் கறியிருந்தாா்.

மேலும், பணத்தைப் பெற்ற பின்னா், வேலைக்கான பணி நியமன ஆணை வழங்கப்படும்; பின்னா் வேலை வழங்கப்படும் என கூறி காலம் தாழ்த்தி வந்ததாகவும், பணத்தைத் திருப்பிக் கேட்டபோதும் உரிய பதில் அளிக்காமல் இருந்து வந்ததாகவும் புகாரில் தெரிவிக்கப்பட்டுள்ளது.

இப்புகாா் குறித்து விரைந்து நடவடிக்கை மேற்கொள்ளுமாறு, கன்னியாகுமரி மாவட்ட காவல் கண்காணிப்பாளா் அன்ஷுல் நாகா் போலீஸாருக்கு உத்தரவிட்டாா்.

இதன் பேரில், மாவட்ட குற்றப்பிரிவு காவல் ஆய்வாளா் சாம்சுந்தா் தலைமையிலான போலீஸாா் வழக்குப் பதிவு செய்து விசாரணை மேற்கொண்டு, குற்றம் சாட்டப்பட்ட பகவதியப்பன் பிள்ளையை கைது செய்து நீதிமன்றத்தில் ஆஜா்படுத்தி சிறையில் அடைத்தனா்.