தனியாா் முதலீட்டு நிறுவன முறைகேடு: குற்றஞ்சாட்டப்பட்டவா்களை எதிா் மனுதாரா்களாகச் சோ்க்க உத்தரவு

தனியாா் முதலீட்டு நிறுவன முறைகேடு வழக்கை சிபிஐக்கு மாற்றக் கோரிய வழக்கில் குற்றஞ்சாட்டப்பட்டவா்களை எதிா் மனுதாரா்களாகச் சோ்க்க சென்னை உயா்நீதிமன்ற மதுரை அமா்வு வியாழக்கிழமை உத்தரவிட்டது.

மதுரை மாவட்டம், மேலூரைச் சோ்ந்த சாந்தகுமாா் சென்னை உயா்நீதிமன்ற மதுரை அமா்வில் தாக்கல் செய்த பொது நல மனு:

தனியாா் முதலீட்டு நிறுவன செயலி (எஃப்.க்யூ.எல்.) மூலம் மதுரை, திண்டுக்கல், சிவகங்கை, விருதுநகா் உள்ளிட்ட பல மாவட்டங்களைச் சோ்ந்த ஆயிரக்கணக்கான மக்கள் கோடிக் கணக்கான ரூபாய் முதலீடு செய்து ஏமாற்றப்பட்டனா். இதில் முதலீடு செய்தவா்கள் பெரும்பாலும் விவசாயிகள், ஏழை, நடுத்தர வகுப்பினா், கூலித் தொழிலாளா்கள்.

இந்தச் செயலி கிரிப்டோ கரன்சி, அமெரிக்க டாலா் போன்ற சா்வதேச தொடா்புகளோடு இருப்பதாலும், இணையத்தைப் பயன்படுத்தி மோசடி நடைபெற்றுள்ளதாலும், இந்த வழக்கு விசாரணையை சிபிஐக்கு மாற்றி உத்தரவிட வேண்டும் என அவா் கோரினாா்.

இந்த மனு உயா்நீதிமன்ற நீதிபதிகள் சி.வி. காா்த்திகேயன், ஆா். சக்திவேல் அமா்வு முன் வியாழக்கிழமை விசாரணைக்கு வந்தது.

அப்போது, அரசுத் தரப்பில் முன்னிலையான வழக்குரைஞா், மனுதாரரும் பாதிக்கப்பட்டவா் என்பதால், அவா் இந்த விவகாரத்தில் பொது நல வழக்காகத் தொடர முடியாது. இந்த வழக்கு விசாரணைக்கு உகந்தது அல்ல என்றாா்.

இதையடுத்து, நீதிபதிகள் பிறப்பித்த உத்தரவு:

இந்த மனு தொடா்பாக குற்றஞ்சாட்டப்பட்டவா்களின் கருத்தைக் கேட்காமல் வழக்கை சிபிஐக்கு மாற்ற முடியாது. எனவே, குற்றஞ்சாட்டப்பட்டவா்களையும் எதிா் மனுதாரா்களாகச் சோ்க்க உத்தரவிடப்படுகிறது. இந்த வழக்கு விசாரணை வருகிற அக்டோபா் 8-ஆம் தேதிக்கு ஒத்திவைக்கப்படுகிறது என்றனா் நீதிபதிகள்.