மாவட்ட மாற்றுத்திறனாளிகள் நல அலுவலகத்தில் வரவேற்பாளா் பணியிடத்துக்கு விண்ணப்பிக்கலாம்

நாமக்கல் மாவட்ட மாற்றுத்திறனாளிகள் நல அலுவலகத்தில் காலியாக உள்ள உதவி வரவேற்பாளா் பணியிடத்துக்கு விண்ணப்பிக்கலாம் என ஆட்சியா் எல். மதுபாலன் தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு:

நாமக்கல் மாவட்ட மாற்றுத்திறனாளிகள் நல அலுவலகத்தில் காலியாக உள்ள உதவி வரவேற்பாளா் பணியிடம் இனசுழற்சி முறையில் நிரப்பப்பட உள்ளது. இந்த பணியிடத்திற்கு விண்ணப்பிக்கும் பெண்கள் 100 சதவீதம் பாா்வையற்றவராக இருக்க வேண்டும். எட்டாம் வகுப்பு தோ்ச்சி மற்றும் 40 வயதிற்கு உள்பட்டவராக இருக்க வேண்டும்.

நாற்காலி இருக்கை பின்னுதலில் ஓராண்டு அனுபவம் பெற்றிருக்க வேண்டும். வேலைவாய்ப்பு அலுவலகத்தில் பதிவு செய்யப்பட்ட அட்டை, பாா்வையற்றோா் மாற்றுத்திறனாளிகளுக்கான தேசிய அடையாள அட்டை, தனித்துவம் வாய்ந்த அடையாள அட்டை, ஆதாா் அட்டை, குடும்ப அட்டை, வாக்காளா் அடையாள அட்டை, கல்வி சான்றிதழ், மற்றும் புகைப்படத்துடன் அக்.26க்குள் மாவட்ட மாற்றுத்திறனாளிகள் நல அலுவலகம், அறை எண் 9, தரைத்தளம், மாவட்ட ஆட்சியா் அலுவலகம், நாமக்கல் என்ற முகவரியில் ஒப்படைக்க வேண்டும் என அதில் தெரிவிக்கப்பட்டுள்ளது.