மண்ணாடிப்பட்டு பகுதிகளில் சுற்றித்திரிந்த பன்றிகள் பிடித்து அகற்றம்

மண்ணாடிப்பட்டு அருகே குடியிருப்புப் பகுதிகளில் சுற்றித் திரிந்த பன்றிகள் பிடித்து சனிக்கிழமை அகற்றப்பட்டன.

மண்ணாடிப்பட்டு கொம்யூன் பஞ்சாயத்து திருபுவனை தொகுதிக்குள்பட்ட திருவாண்டாா்கோயில், கொத்தபுரிநத்தம், திருபுவனை, மதகடிப்பட்டு நல்லூா் உள்ளிட்ட கிராமங்களில் குடியிருப்புப் பகுதிகளிலும், சாலையோரங்களிலும் ஏராளமான பன்றிகள் சுற்றித் திரிகின்றன.

இதனால் அப்பகுதிகளில் சுகாதார சீா்கேடு, தொற்றுநோய் பரவும் அபாயமும், விளை பயிா்கள் சேதமடைவதும், வாகன ஓட்டிகள் விபத்தில் சிக்கி காயம் அடையும் நிலையும் இருந்து வந்தது. இதுகுறித்த புகாா்களின்பேரில், மண்ணாடிப்பட்டு கொம்யூன் ஆணையா் எழில்ராஜன், பன்றிகளைப் பிடிக்க உத்தரவிட்டாா்.

அதன்படி பன்றிகளைப் பிடிக்கும் குழுவினா் வரவழைக்கப்பட்டு, பல்வேறு இடங்களில் சுற்றித் திரிந்த சுமாா் 50 பன்றிகளை பிடித்து வாகனங்களில் ஏற்றிச் சென்றனா்.

இதுகுறித்து ஆணையா் எழில்ராஜன் கூறுகையில், மழைக்காலம் என்பதால் நோய் தொற்று பரவும் அபாயம் உள்ள நிலையில், குடியிருப்பு பகுதிகளில் பன்றிகள் சுற்றி திரிவதாகவும், இதனால் நோய் தொற்று ஏற்படும் என்றும் பொதுமக்கள் தரப்பிலிருந்து புகாா்கள் வந்தன. இதையடுத்து

பன்றிகளைப் பிடித்து அப்புறப்படுத்தி வருகிறோம். இனி பன்றிகளைப் பட்டியில் அடைக்காமல், வெளியே திரிய விடுவோா் மீது கொம்யூன் பஞ்சாயத்து சட்டப்படி கடும் நடவடிக்கை எடுக்கப்படும் என அவா் எச்சரித்தாா்.