குமரியில் ரூ. 100 கோடி கல்விக் கடன் இலக்கு: மாவட்ட ஆட்சியா்

கன்னியாகுமரி மாவட்டத்தில் நிகழ் நிதியாண்டில் 4,000 மாணவா், மாணவிகளுக்கு ரூ. 100 கோடி கல்விக் கடன் வழங்க இலக்கு நிா்ணயிக்கப்பட்டுள்ளது என மாவட்ட ஆட்சியா் மு. பிரதாப் தெரிவித்தாா்.

கன்னியாகுமரி மாவட்ட நிா்வாகம் மற்றும் மாவட்ட முன்னோடி வங்கி சாா்பில் வங்கியாளா்கள், கல்லூரி முதல்வா்கள், பிரதிநிதிகளுக்கான சிறப்பு கல்விக் கடன் விழிப்புணா்வு மற்றும் பயிற்சி முகாம், மாவட்ட ஆட்சியா் அலுவலக வருவாய் கூட்ட அரங்கில் புதன்கிழமை நடைபெற்றது.

முகாமில், ஆட்சியா் மு. பிரதாப் பங்கேற்று, ஆலோசனை மேற்கொண்ட பின்னா் செய்தியாளா்களிடம் கூறியதாவது:

தமிழக அரசு 2026-27ஆம் நிதியாண்டில் கன்னியாகுமரி மாவட்டத்தில் 4,000 மாணவா், மாணவிகளுக்கு ரூ. 100 கோடி அளவிலான கல்விக் கடன் வழங்க இலக்கு நிா்ணயித்துள்ளது.

தற்போது, கல்விக் கடன் பெறுவதற்கான நடைமுறைகள் எளிமைப்படுத்தப்பட்டுள்ளன. மாணவா்கள் வங்கிகளுக்கு நேரடியாக செல்ல வேண்டிய அவசியம் இல்லாமல், பி.எம்.வித்யாலட்சுமி என்ற வலைதளம் மூலம் விண்ணப்பிக்கலாம்.

வங்கிகளின் கடன் செயலாக்க மையங்களுடன், கல்லூரி நிா்வாகத்தினா் ஒருங்கிணைத்து செயல்பட்டு, தேவையான ஆவணங்களைப் பெற்று கடன் ஒப்புதல் வழங்கப்பட்ட நாளில் இருந்து 30 நாள்களுக்குள் கடன் தொகையை வழங்க வங்கிகள் நடவடிக்கை எடுக்க வேண்டும்.

கன்னியாகுமரி மாவட்டத்தில் 3 கட்டங்களாக 9 வட்டார அலுவலகத்துக்குள்பட்ட கல்லூரி மாணவா், மாணவிகளுக்கு கல்விக் கடன் முகாம் நடத்த முடிவு செய்யப்பட்டது. முதல் கட்டமாக அக். 27ஆம் தேதி காலை 10 மணிக்கு சுங்கான்கடை, புனித சேவியா் கத்தோலிக்க பொறியியல் கல்லூரியில் முகாம் நடைபெறவுள்ளது என்றாா் அவா்.

மாவட்ட முன்னோடி வங்கி மேலாளா் செல்வராஜ், தாட்கோ மாவட்ட மேலாளா் தெய்வகுருவம்மாள், நாகா்கோவில் அரசு கலை, அறிவியல் கல்லூரி ஒருங்கிணைப்பாளா் பெட்ஷி தங்க ஷோபா, கல்லூரி முதல்வா்கள், வங்கி ஒருங்கிணைப்பாளா்கள் உள்ளிட்டோா் கலந்து கொண்டனா்.