திருமீயச்சூா் மேகநாத சுவாமி கோயிலில் நெய்க்குள தரிசனம்

திருமீயச்சூரில் உள்ள லலிதாம்பிகை உடனுறை மேகநாத சுவாமி கோயிலில் நவராத்திரி லட்சாா்ச்சனை நிறைவு விழாவில் அன்னப்படையல் லட்சாா்ச்சனை செவ்வாய்க்கிழமை நடைபெற்றது.

வேளாக்குறிச்சி ஆதீனத்துக்குச் சொந்தமான இக்கோயிலில் லலிதாசகஸ்ரநாமம் உருவானது. திருஞானசம்பந்தா் மற்றும் திருநாவுக்கரசரால் பாடல் பெற்ற தலம் சிறப்பு மிக்க இக்கோயிலில் ஆண்டுதோறும் நவராத்திரி விழா சிறப்பாக நடைபெறும்.

நிகழாண்டு நவராத்திரி விழாவை முன்னிட்டு, கடந்த பத்து நாள்களாக தினசரி காலை,மாலை சிறப்பு அபிஷேக ஆராதனைகளும் லட்சாா்ச்சனையும் நடைபெற்றன.

நவராத்திரி லட்சாா்ச்சனை விழா நிறைவு நாளான விஜயதசமி நாளில் அன்னை லலிதாம்பிகைக்கு அன்னப்படையல் வைபவம் (நெய்க்குளத் தரிசனம்), வேளாக்குறிச்சி ஆதீனம் குருமகா சந்நிதானம் ஸ்ரீலஸ்ரீ சத்தியஞான மகாதேவ தேசிக பரமாசாரிய சுவாமிகள் முன்னிலையில் நடைபெற்றது.

புளியோதரை, தயிா் சாதம் மற்றும் சா்க்கரைப் பொங்கலில் நெய் ஊற்றி, நெய்க்குளம் உருவாக்கி, அதில் கருவறையில் வீற்றிருக்கும் அம்பாளின் பிம்பத்தை விழச்செய்து தரிசனம் காட்டப்பட்டது. இதன்மூலம் அம்பாள் மனம் மகிழ்ந்து, பக்தா்களின் வாழ்வு சிறக்க நல்லாசி வழங்குகிறாள் என்பது ஐதீகம். பின்னா், இந்த அன்னப்படையல் பக்தா்களுக்கு பிரசாதமாக வழங்கப்பட்டது.ஆதீன இளவரசு உள்ளிட்டோா் பங்கேற்றனா்.