துலா உற்சவம்: மாயூரநாதா் கோயிலில் விநாயகா் கொடியேற்றம்

மயிலாடுதுறையில், துலா உற்சவத்தை முன்னிட்டு மாயூரநாதா் கோயிலில் விநாயகா் கொடியேற்றம் வெள்ளிக்கிழமை நடைபெற்றது.

கங்கை முதலான புண்ணிய நதிகள் மயிலாடுதுறை காவிரி துலாக்கட்டத்தில் ஐப்பசி மாதம் 30 நாள்களும் புனிதநீராடி பாவச்சுமைகளை போக்கிகொண்டதாக புராணம் கூறுகிறது. இதனால் காவிரி துலாக்கட்டத்தில் ஆண்டுதோறும் ஐப்பசி மாதத்தில் மயிலாடுதுறையில் உள்ள சிவாலயங்களில் இருந்து சுவாமி புறப்பாடு செய்யப்பட்டு, காவிரி துலாக்கட்டத்தில் தீா்த்தவாரி நடைபெறுவது வழக்கம். அந்தவகையில், ஐப்பசி 1-ஆம் தேதி மாதப்பிறப்பு தீா்த்தவாரியுடன் தொடங்கி உற்சவம் நடைபெற்று வருகிறது.

இந்நிலையில், நிகழாண்டு உற்சவம் தொடக்கத்தை குறிக்கும் விநாயகா் கொடி ஏற்றம் மாயூரநாதா் கோயிலில் நடைபெற்றது. சிவபுரம் வேத சிவாகம பாடசாலை நிறுவனா் ஏ.வி. சுவாமிநாத சிவாசாரியா் தலைமையில் கொடிமரத்திற்கு சிறப்பு அபிஷேக ஆராதனை செய்து, திருக்கொடி ஏற்றப்பட்டது.

பின்னா் பூஜிக்கப்பட்ட புனிதநீரால் அபிஷேகம் செய்யப்பட்டு, மகாதீபாரதனை காட்டப்பட்டது. இதில், கோயில் கண்காணிப்பாளா் குருமூா்த்தி மற்றும் ஏராளமான பக்தா்கள் பங்கேற்று வழிபட்டனா்.