சேலம் வழியாக இயக்கப்படும் வேளாங்கண்ணி விரைவு ரயில் இனி குப்பத்தில் நிறுத்தப்படும்: ரயில்வே அறிவிப்பு

சேலம் வழியாக இயக்கப்படும் வேளாங்கண்ணி ரயில் சோதனை அடிப்படையில் குப்பம் ரயில் நிலையத்தில் நிறுத்தப்படும் என அறிவிக்கப்பட்டுள்ளது.

இதுகுறித்து தெற்கு ரயில்வே சேலம் கோட்டம் வெளியிட்ட செய்திக்குறிப்பு:

சேலம் ரயில்வே கோட்டம் வழியாக இயக்கப்படும் 2 வாராந்திர விரைவு ரயில்கள், ஆந்திர மாநிலம், குப்பம் ரயில் நிலையத்தில் சோதனை அடிப்படையில் நின்று செல்ல ரயில்வே நிா்வாகம் முடிவு செய்துள்ளது.

அதன்படி, சேலம், ஈரோடு, கரூா், திருச்சி வழியாக வேளாங்கண்ணிக்கு இயக்கப்படும் வாஸ்கோடகாமா-வேளாங்கண்ணி வாராந்திர விரைவு ரயில் 21 ஆம் தேதி முதல் குப்பம் ரயில் நிலையத்தில் நின்று செல்லும்.

இதேபோல, மறுமாா்க்கத்தில் திருச்சி, கரூா், ஈரோடு, சேலம் வழியாக இயக்கப்படும் வேளாங்கண்ணி - வாஸ்கோடகாமா வாராந்திர விரைவு ரயில் வரும் 22 ஆம் தேதி முதல் குப்பத்தில் நின்று செல்லும். இந்த 2 ரயில்களும் சோதனை அடிப்படையில், குப்பம் ரயில் நிலையத்தில் நிறுத்தப்படும். மறுஅறிவிப்பு வரும் வரை இந்த நடைமுறை அமலில் இருக்கும் என தெரிவிக்கப்பட்டுள்ளது.