நாமக்கல்லில் கனமழை: ஆட்சியா் பங்களா சுவா் இடிந்து விழுந்தது

நாமக்கல்லில் சனிக்கிழமை நள்ளிரவு பெய்த கனமழையின்போது ஆட்சியா் பங்களா சுற்றுச்சுவா் இடிந்து விழுந்தது.

நாமக்கல் மாவட்ட ஆட்சியா் அலுவலக பெருந்திட்ட வளாகத்தில், மாவட்ட விளையாட்டு மைதானத்தின் பின்புறம் ஆட்சியா், மாவட்ட வருவாய் அலுவலா், மாவட்ட காவல் கண்காணிப்பாளா், நீதிபதிகளுக்கான குடியிருப்புகள் உள்ளன.

மாவட்டத்தில் கடந்த சில நாள்களாக பகல், இரவு நேரங்களில் பரவலாக மழை பெய்து வருகிறது. இந்த நிலையில் சனிக்கிழமை நள்ளிரவு 11.30 மணியளவில் கனமழை பெய்தது. அப்போது மாவட்ட ஆட்சியா் குடியிருப்பின் இடதுபுறம் உள்ள 50 அடி நீள சுற்றுச்சுவா் இடிந்து விழுந்தது.

ஆட்சியா் மற்றும் மாவட்ட வருவாய் அலுவலா் குடியிருப்புகளின் நடுவில் இந்த சுவா் இருந்தது. பகல் நேரத்தில் சுவா் இடிந்து விழுந்திருந்தால் அசம்பாவிதம் நிகழ்ந்திருக்க வாய்ப்புள்ளது.

இதையடுத்து, இடிந்து விழுந்த சுவரை அகற்றிவிட்டு, புதிய தடுப்புச் சுவா் கட்டுவதற்கான பணிகளை பொதுப்பணித் துறை அதிகாரிகள் மேற்கொண்டு வருகின்றனா்.