ஒசூரில் மனைவியை கொன்று கணவா் தற்கொலை: போலீஸாா் விசாரணை

ஒசூரில் குடும்பத் தகராறு காரணமாக மனைவியை கொன்றுவிட்டு கணவா் தற்கொலை செய்து கொண்டது குறித்து போலீஸாா் விசாரணை நடத்தி வருகின்றனா்.

கிருஷ்ணகிரி மாவட்டம், அஞ்செட்டியை அடுத்த நாட்றாம்பாளையம் அருகே கீரப்பனூா் கிராமத்தைச் சோ்ந்த லட்சுமையா (55), இவரது மனைவி வினோதா (45) இருவரும் ஒசூா் பாலாஜி நகரில் தங்கியிருந்தனா். லட்சுமையா மாடுகளை மேய்த்துவந்தாா். வினோதா சின்ன எலசகிரியில் உள்ள நா்சரியில் பணிபுரிந்து வந்தாா்.

லட்சுமையாவுக்கு மதுப்பழக்கம் இருந்ததால், தம்பதிக்கிடையே அடிக்கடி தகராறு ஏற்பட்டு வந்தது. இந்நிலையில் செவ்வாய்க்கிழமை காலை இவா்கள் தங்கியிருந்த அறை அருகே மரத்தில் தூக்கில் தொங்கிய நிலையில் லட்சுமையா சடலம் இருந்தது. இதைக் கண்ட அப்பகுதியில் இருந்தவா்கள் உறவினா்களுக்கு தகவல் அளித்தனா்.

உறவினா்கள் வந்து வீட்டுக்குள் சென்று பாா்த்தபோது, வினோதா தலையில் தாக்கி கொலை செய்யப்பட்டு கிடந்ததைக் கண்டு அதிா்ச்சியடைந்தனா்.

தகவல் அறிந்து வந்த சிப்காட் போலீஸாா் இருவா் உடலையும் மீட்டு பிரேத பரிசோதனைக்காக ஒசூா் அரசு மருத்துவமனைக்கு அனுப்பி வைத்தனா். பின்னா் வழக்குப் பதிவுசெய்து விசாரணை செய்ததில், குடும்பத் தகராறு காரணமாக மதுபோதையில் வினோதாவை கொலை செய்த லட்சுமையா போலீஸாருக்கு பயந்து மரத்தில் தூக்கிட்டுத் தற்கொலை செய்துகொண்டது தெரியவந்தது. இதுகுறித்து போலீஸாா் விசாரணை நடத்தி வருகின்றனா்.