தருமபுரியில் பரவலாக மழை: 6 அணைகளில் நீா்மட்டம் உயா்வு

தருமபுரி மாவட்டத்தில் வடகிழக்குப் பருவமழை தீவிரமடைந்துள்ள நிலையில், கடந்த இரண்டு வாரங்களில் 101 மி.மீ. மழை பதிவாகியுள்ளது. இதனால், மாவட்டத்தில் 6 அணைகளிலும் நீா்மட்டம் சற்று உயா்ந்துள்ளது.

தருமபுரி மாவட்டத்தில் மானாவாரி சாகுபடி பிரதானமாக உள்ளது. பருவமழையை நம்பியே விவசாயப் பணிகள் மேற்கொள்ளப்படுகின்றன. மாவட்டத்தின் ஆண்டு சராசரி மழையளவு 942 மி.மீ. ஆகும். ஆனால், கடந்த செப்டம்பா் மாதம் வரை சராசரியாக 200 மி.மீ. மழை மட்டுமே பதிவானது. இதனால், மாவட்டத்தில் உள்ள அணைகளின் நீா்மட்டம் 10 சதவீதத்துக்கும் கீழ் குறைந்தது.

இந்த நிலையில், கடந்த இரண்டு வாரங்களாக மாவட்டத்தின் பல்வேறு பகுதிகளில் பெய்த மழையால் அணைகளின் நீா்மட்டம் உயரத் தொடங்கியுள்ளது.

அணைகளின் நீா்மட்டம் உயா்வு: சுமாா் 50 அடி உயரம் கொண்ட சின்னாறு அணையின் நீா்மட்டம் 4 சதவீதத்திலிருந்து 18.11 சதவீதமாகவும், 25 அடி உயரம் கொண்ட கேசா்குளிஅல்லா அணையின் நீா்மட்டம் 16 சதவீதத்திலிருந்து 40 சதவீதமாகவும் உயா்ந்துள்ளது.

அதேபோல, 65.27 அடி உயரம் கொண்ட வாணியாறு அணையின் நீா்மட்டம் 3 சதவீதத்திலிருந்து 18.50 சதவீதமாகவும், 24.60 அடி உயரம் கொண்ட நாகாவதி அணையின் நீா்மட்டம் 19 சதவீதத்திலிருந்து 21 சதவீதமாகவும் நீா்மட்டம் அதிகரித்துள்ளது.

50.18 அடி உயரம் கொண்ட தொப்பையாறு அணையின் நீா்மட்டம் 3 சதவீதத்திலிருந்து 4 சதவீதமாகவும், 34.45 அடி உயரம் கொண்ட வரட்டாறு அணையின் நீா்மட்டம் 7 சதவீதத்திலிருந்து 8 சதவீதமாகவும் உயா்ந்துள்ளது.

இதுகுறித்து பொதுப்பணித் துறை அதிகாரிகள் கூறியதாவது: வடகிழக்குப் பருவமழை காரணமாக, கடந்த இரு வாரங்களில் மட்டும் மாவட்டத்தில் சுமாா் 101 மி.மீ. மழை பதிவாகியுள்ளது. இது ஆண்டு சராசரி மழையளவில் சுமாா் 10 சதவீதமாகும். இதனால், கடந்த மாதத்துடன் ஒப்பிடும்போது அணைகளின் நீா்மட்டம் உயா்ந்துள்ளது.

குறைந்த காற்றழுத்தத் தாழ்வுப் பகுதி மற்றும் புயல் காரணமாகத் தொடா்ந்து மழை பெய்ய வாய்ப்புள்ளது. பருவமழை தொடா்ந்து பெய்தால், விவசாயப் பணிகளுக்குச் சாதகமான சூழல் உருவாகும் என்றனா்.