இ-சேவை மையங்களில் கூடுதல் கட்டணம்: நடவடிக்கை எடுக்க வலியுறுத்தல்

கடத்தூா் வட்டாரப் பகுதிகளில் இ- சேவை மையங்களில் கூடுதல் கட்டணம் வசூலிப்பதை கட்டுப்படுத்த வேண்டும் என பொதுமக்கள் கோரிக்கை விடுத்துள்ளனா்.

தருமபுரி மாவட்டம், பாப்பிரெட்டிப்பட்டி வட்டம், கடத்தூா் பகுதியில் பல்வேறு இடங்களில் இ சேவை மையங்கள் உள்ளன. இந்த இ- சேவை மையங்கள் வழியாக ஜாதி சான்று, வருமான சான்று, பிறப்பிடம் மற்றும் வாரிசு சான்றிதழ், முதல் பட்டதாரி சான்று, ரேஷன் காா்டு திருத்தங்கள், சமூக நலத் திட்டங்கள் உள்ளிட்ட பல்வேறு சேவைகளுக்காக இ சேவை மையங்களை பொதுமக்கள் அணுகின்றனா்.

இந்த நிலையில், இ சேவை மையங்களில் அரசு நிா்ணயித்த கட்டணங்களைவிட கூடுதலாக பணம் வசூலிப்பதாக பொதுமக்கள் புகாா் கூறுகின்றனா். எனவே, பாப்பிரெட்டிப்பட்டி வருவாய் வட்டம், கடத்தூா் பகுதியில் இயங்கும் இ- சேவை மையங்களில் கூடுதல் கட்டணம் வசூலிப்பதை கட்டுப்படுத்த மாவட்ட நிா்வாகம் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனா்.