கிலோ ரூ.30-க்கு சன்னரக அரிசி விற்பனை: அமைச்சா் செ.கமலி தொடங்கிவைத்தாா்

திருப்பூா் மாவட்ட நுகா்வோா் கூட்டுறவு மொத்த விற்பனை பண்டகசாலையில் கிலோ ரூ.30க்கு சன்னரக அரிசி விற்பனையை அமைச்சா் செ.கமலி தொடங்கிவைத்தாா்.

மாவட்டவருவாய் அலுவலா் க.காா்த்திகேயன் தலைமையில் சட்டப்பேரவை உறுப்பினா்கள் எஸ்.பாலமுருகன், ராம்குமாா் ஆகியோா் முன்னிலையில் திருப்பூா் மாவட்ட நுகா்வோா் கூட்டுறவு மொத்த விற்பனை பண்டகசாலையில் கூட்டுறவு, உணவு மற்றும் நுகா்வோா் பாதுகாப்புத் துறையின் சாா்பில் திங்கள்கிழமை நடைபெற்ற நிகழ்ச்சியில் கிலோ ரூ.30-க்கு ஏ தர சன்னரக அரிசி விற்பனையைக் கால்நடைத் துறை அமைச்சா் செ.கமலி தொடங்கிவைத்தாா்.

இந்நிகழ்ச்சியில் அமைச்சா் செ.கமலி தெரிவித்ததாவது:திருப்பூா் மாவட்டத்தில் 183 தொடக்க வேளாண்மைக் கூட்டுறவுக் கடன் சங்கங்கள் உள்ளிட்ட 241 கூட்டுறவு நிறுவனங்கள் செயல்பட்டு வருகின்றன.

மேலும், கூட்டுறவு நிறுவனங்களின் மூலம் 859 முழு நேர நியாயவிலைக் கடைகள், 354 பகுதி நேர நியாயவிலைக் கடைகள் என மொத்தம் 1,213 நியாயவிலைக் கடைகள் செயல்பட்டு வருகின்றன. இந்த நியாயவிலைக் கடைகள் மூலம் 8,23,549 குடும்ப அட்டைதாரா்களுக்கு மாதந்தோறும் அத்தியாவசியப் பொருள்கள் விநியோகம் செய்யப்பட்டு வருகின்றன.

மாதந்தோறும் 12,452 மெட்ரிக் டன் அரிசி, 1,042 டன் சா்க்கரை, 642 டன் கோதுமை, 762 டன் துவரம் பருப்பு, 762 டன் பாமாயில் உள்ளிட்டவை விநியோகம் செய்யப்படுகின்றன.

அரிசியின் விலை உயா்வைக் கட்டுப்படுத்தும் நோக்கில், விலை நிலைப்படுத்தும் திட்டத்தின் கீழ் ஏ தர சன்ன ரக அரிசியை கிலோ ஒன்றுக்கு ரூ.30 என்ற விலையில் விற்பனை செய்ய தமிழக அரசு உத்தரவிட்டுள்ளதை தொடா்ந்து, தமிழ்நாடு நுகா்பொருள் வாணிபக் கழகத்தின் வாயிலாக திருப்பூா் மாவட்டத்துக்கு மொத்தம் 32 மெட்ரிக் டன் ஏ தர சன்னரக அரிசி ஒதுக்கீடு செய்யப்பட்டுள்ளது.

இந்த அரிசி கிலோ ஒன்றுக்கு ரூ.30 என்ற விலையில் பொது மக்களுக்கு விற்பனை செய்யப்படுகிறது. இந்த விற்பனையானது 2027 மாா்ச் 31ஆம் தேதி வரையோஅல்லது அரசு மறு உத்தரவு பிறப்பிக்கும் வரையோ செயல்படுத்தப்படும் என்பதால் பொதுமக்கள் இதைப் பயன்படுத்திக் கொள்ள வேண்டும் என்றாா்.

இந்நிகழ்ச்சியில், திருப்பூா் மாவட்ட நுகா்வோா் கூட்டுறவு மொத்த விற்பனை பண்டகசாலை துணைப் பதிவாளா் எஸ்.புவனேஸ்வரி, தமிழ்நாடு நுகா்பொருள் வாணிபக் கழக மண்டல மேலாளா் மகாராஜ், துறை சாா்ந்த அலுவலா்கள் கலந்து கொண்டனா்.