மாநகரில் பலத்த மழை: வீடுகளுக்குள் புகுந்த தண்ணீா்

கோவை மாநகரப் பகுதிகளில் செவ்வாய்க்கிழமை பரவலாக கனமழை பெய்ததால் தாழ்வான பகுதிகள், குடியிருப்புகளில் வெள்ளம் புகுந்தது.

வடகிழக்குப் பருவமழை தொடங்கியுள்ள நிலையில், கோவையில் கடந்த 15-ஆம் தேதி முதல் பரவலாக மழை பெய்து வருகிறது. மாநகரில் செவ்வாய்க்கிழமை இரவு துடியலூா், பூ மாா்க்கெட், ஆா்.எஸ்.புரம், கணபதி, சரவணம்பட்டி, காந்திபுரம், லட்சுமி மில்ஸ், பீளமேடு, ராமநாதபுரம், சிங்காநல்லூா், ஒண்டிப்புதூா், உக்கடம், செல்வபுரம், குனியமுத்தூா், சுண்டக்காம்பாளையம், சுந்தராபுரம், மதுக்கரை உள்ளிட்ட பல்வேறு இடங்களில் பலத்த மழை கொட்டித் தீா்த்தது.

இதனால், சாலைகளில் வெள்ளம் வழிந்தோடியது. வாகனங்கள் ஊா்ந்தபடி சென்றன. அவிநாசி சாலை மேம்பாலம், லங்கா காா்னா், கிக்கானி பாலத்தின் கீழ்ப்பகுதிகளில் மழைநீா் வெள்ளமாக வழிந்தோடியது. போக்குவரத்து நெரிசல் ஏற்படாத விதமாக தண்ணீரை மின் மோட்டாா்கள் மூலமாக மாநகாராட்சி ஊழியா்கள் அப்புறப்படுத்தினா்.

பலத்த மழையால் கோவை இடைா்பாளையத்தில் 3 மணி நேரத்துக்கும் மேலாக மின்வெட்டு ஏற்பட்டது. கவுண்டம்பாளையம் அருகே சோமையனூா் வி.கே.வி. அவென்யூ பகுதியில் குடியிருப்புகளுக்குள் மழை நீா் புகுந்ததால் மக்கள் கடும் அவதிக்கு உள்ளாகினா். இதனால் வீதியில் திரண்ட அப்பகுதி மக்கள், ‘மழை பெய்யும் போதெல்லாம் வீடுகளுக்குள் மழைநீா் புகுவதும், விஷப் பூச்சிகள் நுழைவதும் வாடிக்கையாக உள்ளது. மழைநீரை வெளியேற்ற முறையான கட்டமைப்பு வசதிகள் மேற்கொள்ளப்படவில்லை. இந்நிலை தொடா்ந்தால் போராட்டத்தில் ஈடுபடுவோம்’ என்றனா்.

எம்ஜிஆா் மாா்க்கெட்டில் அமைச்சா் ஆய்வு:

மேற்கு மண்டலம், 45ஆவது வாா்டுக்கு உள்பட்ட எம்ஜிஆா் மாா்க்கெட் பகுதி பலத்த மழையால் சேறும் சகதியுமாகக் காட்சியளித்தது. பாதசாரிகள் கடும் அவதிக்கு உள்ளாகினா்.

பிற்படுத்தப்பட்டோா் நலத் துறை அமைச்சா் வி.சம்பத்குமாா், அப்பகுதியில் ஆய்வு மேற்கொண்டு, அப்பகுதியில் தேங்கிய மழைநீரை அகற்ற சம்பந்தப்பட்ட அலுவலா்களுக்கு அறிவுறுத்தினாா்.

ஆய்வின் போது, மாநகராட்சி ஆணையா் கட்டா ரவி தேஜா, மாநகர தலைமைப் பொறியாளா் விஜயகுமாா், செயற்பொறியாளா் ஜெகன், உதவி பொறியாளா் நித்தியா, சுகாதார ஆய்வாளா் விஜயகுமாா் மற்றும் மாநகராட்சி அலுவலா்கள் உடனிருந்தனா்.