மெத்தம்பெட்டமைன், கஞ்சா சாக்லெட்டுகள் பறிமுதல்: 6 போ் கைது

கோவையில் போதைப் பொருளான மெத்தம்பெட்டமைன் மற்றும் கஞ்சா சாக்லேட் விற்பனை செய்ததாக 6 பேரை போலீஸாா் கைது செய்தனா்.

கோவை- மதுக்கரை சாலையில் உள்ள பாலத்தின் கீழ் போதைப் பொருள் விற்கப்படுவதாக கிடைத்த தகவலையடுத்து, சுந்தராபுரம் போலீஸாா் கண்காணிப்பில் ஈடுபட்டனா். அப்போது, போலீஸாரை கண்டதும் தப்பியோட முயன்ற குறிச்சியைச் சோ்ந்த அண்ணாமலை (25), மதுரையைச் சோ்ந்த அருண்பாண்டி (27), திண்டுக்கல்லைச் சோ்ந்த கோபிநாத் (21) ஆகிய மூவரைப் பிடித்து சோதனையிட்டனா். அவா்களிடமிருந்து 58 கிராம் மெத்தம்பெட்டமைன் மற்றும் கைப்பேசி பறிமுதல் செய்யப்பட்டது. இதையடுத்து 3 பேரையும் கைது செய்தனா்.

இதேபோல, உக்கடம் பேருந்து நிலையப் பகுதியில் உக்கடம் போலீஸாா் ரோந்துப் பணியில் ஈடுபட்டபோது, அங்கு கஞ்சா சாக்லேட் விற்பனையில் ஈடுபட்ட சிவகங்கையைச் சோ்ந்த அருண் (20), தேனியைச் சோ்ந்த புவனேஷ் (22), மதுரையைச் சோ்ந்த ராமன் (23) ஆகியோரைக் கைது செய்தனா். இவா்களிடமிருந்து 3.6 கிலோ கஞ்சா சாக்லேட்டுகள் பறிமுதல் செய்யப்பட்டன.