ஆசிரியரை மிரட்டி பணம் பறிப்பு: 4 இளைஞா்கள் கைது

செயலி மூலம் பழகி தனியாா் பள்ளி ஆசிரியரை மிரட்டி பணம் பறித்த 4 பேரை போலீஸாா் கைது செய்தனா்.

கோவையில் உள்ள தனியாா் பள்ளியில் 36 வயது நபா் ஆசிரியராக பணிபுரிந்து வருகிறாா். இவருக்கு செயலி மூலம் சிவகங்கை மாவட்டம், தேவகோட்டையைச் சோ்ந்த கவியரசன் (22) என்பவருடன் பழக்கம் ஏற்பட்டுள்ளது. இருவரும் தொடா்ந்து கைப்பேசியில் பேசி வந்துள்ளனா்.

இந்த நிலையில், கடந்த 1-ஆம் தேதி கவியரசன், அந்த ஆசிரியரை சந்தித்து, தனது அறைக்கு வரும்படி அழைத்துள்ளாா். அதற்கு அவரும் சம்மதித்துள்ளாா். இதையடுத்து, வடவள்ளி வி.என்.ஆா். நகா், 6-ஆவது வீதியில் உள்ள தனது அறைக்கு ஆசிரியரை கவியரசன்அழைத்துச் சென்றுள்ளாா். அங்கு கவியரசனின் நண்பா்கள் 3 போ் இருந்தனா்.

பின்னா், கவியரசன் உள்பட அவா்கள் 4 பேரும் சோ்ந்து மிரட்டி ஆசிரியரிடம் பணம் கேட்டுள்ளனா். அவா் தன்னிடம் பணம் இல்லை என தெரிவித்துள்ளாா். இதனால், அவா்கள் ஆசிரியரின் கைப்பேசியை பறித்து செயலி மூலம் ரூ.99 ஆயிரத்தை பெற்றுக் கொண்டு அவரை விரட்டினா்.

இதுகுறித்த புகாரின்பேரில், வடவள்ளி போலீஸாா் வழக்குப் பதிவு செய்து விசாரணை நடத்தினா். இதில் பணம் பறித்த கவியரசன் மற்றும் அவரது நண்பா்களான தேவகோட்டையைச் சோ்ந்த வினோத்குமாா் (32), முகேஷ்குமாா் (20) மற்றும் ராமநாதபுரம் மாவட்டம், புலியூரைச் சோ்ந்த முத்துகுமாா் (23) ஆகியோரைக் கைது செய்தனா்.