பக்கவாத விழிப்புணா்வு தூதுவா்களாக மாணவா்கள் செயல்பட வேண்டும்: அமைச்சா் ராஜ்மோகன்

பக்கவாதத்தைத் தடுப்பதற்கான விழிப்புணா்வு தூதுவா்களாக மாணவா்கள் செயல்பட வேண்டும் என்று பள்ளிக் கல்வித் துறை அமைச்சா் ராஜ்மோகன் வலியுறுத்தினாா்.

அப்போலோ மருத்துவமனை சாா்பில் சென்னை கீழ்ப்பாக்கத்தில் உள்ள பவன்ஸ் ராஜாஜி வித்யாஷ்ரம் பள்ளியில் பக்கவாத விழிப்புணா்வு நிகழ்ச்சி வியாழக்கிழமை நடைபெற்றது. முகம் (ஃபேஸ்), கை (ஆா்ம்), பேச்சில் (ஸ்பீச்) மாற்றம் ஏற்பட்டால் உரிய நேரத்தில் (டைம்) மருத்துவரை அணுக வேண்டும் என்பதைக் குறிக்க ஃபாஸ்ட் (எஃப்-ஏ-எஸ்-டி) என்ற சொல் பக்கவாத விழிப்புணா்வுக்காக பயன்படுத்தப்படுகிறது.

அதன்படி, அந்த வாா்த்தையைக் காட்சிப்படுத்தும் வகையில் மாணவா்கள் அணிவகுத்து நின்றனா். இந்நிகழ்ச்சியில் அமைச்சா் ராஜ்மோகன் பேசியதாவது:

மாணவா்களுக்கு மன வலிமை எப்படி முக்கியமோ, அதுபோலவே உடல் வலிமையும் முக்கியம். பள்ளிகளில் ஒரு உடற்கல்வி வகுப்பைக் கூட வேறு பாடங்களுக்கு வழங்கக் கூடாது. மாணவா்கள் விளையாடினால்தான் வலிமையடைவா். அதைக் கருத்தில்கொண்டே அரசுப் பள்ளிகளில் வாரம் இரு நாள்கள் இருந்த உடற்கல்வி வகுப்பை நாங்கள் ஐந்து நாள்களாக மாற்றினோம்.

விளையாட்டுகளில் ஆழ்ந்து ஈடுபடும்போதும் மனம் மற்றும் உடல் ஆரோக்கியமடைவதுடன், சமூகப் பொறுப்புணா்வும் அதிகரிக்கும்.

அந்த வகையில், சமூகத்தில் எவருக்கேனும் பக்கவாத அறிகுறிகள் தென்பட்டால், அதாவது முகம், கை, பேச்சில் மாற்றம் தென்பட்டால் உரிய நேரத்துக்குள் மருத்துவ உதவி எண்ணை அழைத்து அவா்களைக் காப்பாற்ற வேண்டும். பக்கவாதத்தைத் தடுக்கும் விழிப்புணா்வு தூதுவராக மாணவா்கள் செயல்பட வேண்டும் என்றாா்.

இந்த நிகழ்வில் அப்போலோ மருத்துவமனையின் தலைமை செயல் அதிகாரி டாக்டா் இளங்குமரன் கலியமூா்த்தி, நரம்பியல் சிகிச்சை நிபுணா் டாக்டா் சீனிவாசன் பரமசிவம் உள்ளிட்டோா் கலந்து கொண்டனா்.