சாலை சீரமைக்கக் கோரி பள்ளி மாணவா்களுடன் மக்கள் சாலை மறியல்

எல்லம்பள்ளி காலனிக்குச் செல்லும் மண் சாலை சேறும் சகதியுமாக மாறியதால், அதைச் சீரமைக்கக் கோரி பள்ளி மாணவா்களுடன் பொதுமக்கள் சாலை மறியலில் ஈடுபட்டனா்.

திருத்தணி ஒன்றியம், கிருஷ்ணசமுத்திரம் ஊராட்சிக்கு உள்பட்ட எல்லம்பள்ளி என்கிற பெருகுமி காலனியில் 50-க்கும் மேற்பட்ட குடும்பத்தினா் வசித்து வருகின்றனா். இவா்கள் கிருஷ்ணசமுத்திரம் பேருந்து நிலையத்திலிருந்து மண் சாலை வழியாகத் தங்கள் குடியிருப்புப் பகுதிக்குச் சென்று வருகின்றனா். மேலும், இப்பகுதியைச் சோ்ந்த பள்ளி மாணவா்கள் மண் சாலை வழியாக கிருஷ்ணசமுத்திரம் அரசு நடுநிலைப் பள்ளிக்குச் சென்று வருகின்றனா்.

இந்த நிலையில், கடந்த 3 நாள்களாகப் பெய்த மழையால் மண் சாலை சேறும் சகதியுமாக மாறியுள்ளது. இதனால் பள்ளி மாணவா்கள், பொதுமக்கள் நடந்து செல்ல முடியாமல் கடும் சிரமத்துக்குள்ளாகினா். இருசக்கர வாகன ஓட்டிகளும் அவதிப்பட்டனா்.

இதையடுத்து, மண் சாலையைச் சீரமைக்கக் கோரி எல்லம்பள்ளி காலனியைச் சோ்ந்த பொதுமக்கள் மற்றும் பள்ளி மாணவா்கள் என 50-க்கும் மேற்பட்டோா் செவ்வாய்க்கிழமை திருத்தணி - பொதட்டூா்பேட்டை மாநில நெடுஞ்சாலையில் மறியலில் ஈடுபட்டனா். இதனால் அப்பகுதியில் போக்குவரத்து பாதிக்கப்பட்டது.

தகவலறிந்து சம்பவ இடத்துக்கு வந்த திருத்தணி வட்டாட்சியா் செந்தில்குமாா் மற்றும் போலீஸாா், பொதுமக்களிடம் பேச்சு நடத்தினா். சாலையை சீரமைக்க நடவடிக்கை எடுப்பதாக உறுதியளித்ததைத் தொடா்ந்து, பொதுமக்கள் மறியலைக் கைவிட்டனா்.