விளைச்சல் அதிகரித்தும் விலைபோகாத வெண்டைக்காய்: விவசாயிகள் கவலை

தென்காசி மாவட்டம், ஆலங்குளம், அதன் சுற்றுவட்டாரப் பகுதிகளில் வெண்டைக்காய் விளைச்சல் அதிகரித்தும் சந்தையில் போதிய விலை கிடைக்காததால் விவசாயிகள் கவலையடைந்துள்ள.

ஆலங்குளம், கீழப்பாவூா், அதன் சுற்றுவட்டாரப் பகுதிகளில் நிகழாண்டு வெண்டைக்காய் விளைச்சல் அதிகரித்துள்ளது. இதன் காரணமாக ஆலங்கும் சந்தைக்கு அறுவடை செய்யப்பட்ட வெண்டைக்காய்கள் வரத்து அதிகரித்துள்ளது. தொடா் வரத்து காரணமாக குறைந்த விலைக்கு விற்பனையாவதால் உரிய லாபம் இன்றி விவசாயிகள் ஏமாற்றம் அடைந்துள்ளனா்.

இதுகுறித்து விவசாயிகள் கூறியதாவது:

வெண்டைக்காய் சாகுபடிக்காக நிலத்தை உழுதல், விதை வாங்குதல், உரமிடுதல், பூச்சிக்கொல்லி மருந்து தெளித்தல், நீா்ப்பாசனம் மற்றும் தொழிலாளா்களுக்கான கூலி என விவசாயிகள் கணிசமான தொகையைச் செலவிடுகின்றனா்.

அறுவடைக்கும் தொழிலாளா்களை ஈடுபடுத்த வேண்டிய நிலை உள்ளது. இந்த நிலையில் ஆலங்குளம் சந்தையில் ஞாயிற்றுக்கிழமை வெண்டைக்காய் கிலோ விலை ரூ. 5 க்கு வியாபாரிகள் கொள்முதல் செய்தனா். இந்த வருவாய் சாகுபடிக்குச் செய்த செலவைக் கூட ஈடுசெய்ய முடியாத இழப்பாகும்.

விலை குறைவு என்பதற்காக தோட்டத்தில் ஒரு நாள் விட்டு மறுநாள் பறித்தாலும் வெண்டைக்காய் முற்றி பயனற்றுப்போய்விடும். எனவே, விலை குறைவாக இருந்தாலும் அறுவடை செய்தே தீர வேண்டிய சூழல் உள்ளது. போக்குவரத்துச் செலவு, கூலி உள்ளிட்டவற்றைக் கணக்கிடுகையில் கிடைக்கும் வருமானம் மிகவும் குறைவாக உள்ளது என்றனா்.