எல்நினோ பாதிப்புகளை ஆய்வு செய்ய குழு: வழக்கை முடித்து வைத்தது உயா்நீதிமன்றம்

எல்நினோ பாதிப்பு குறித்து ஆய்வு செய்ய நிபுணா்கள் 7 போ் அடங்கிய குழுவை நியமித்துள்ளதாக தமிழக அரசு சென்னை உயா்நீதிமன்றத்தில் தெரிவித்துள்ளது. இதையடுத்து, அதுதொடா்பான மனுவை முடித்து வைத்து நீதிமன்றம் உத்தரவிட்டது.

இதுதொடா்பாக உயா்நீதிமன்றத்தில் வழக்குரைஞா் அருளரசு என்பவா் தாக்கல் செய்த மனுவில், 160 ஆண்டுகளுக்குப் பிறகு இந்த சூப்பா் எல்நினோ பாதிப்பு தற்போது உருவாகியுள்ளது. அந்த சமயத்தில் ஏற்பட்ட பாதிப்புகளைவிட, தற்போது பாதிப்பு கடுமையாக இருக்கும் எனக் கணிக்கப்பட்டுள்ளது. எனவே, ஏழை மக்கள் பாதிக்காத வகையில், உணவு தானியங்களை இருப்பு வைப்பது அவசியம். எனவே, உரிய நடவடிக்கைகளை மேற்கொள்ள நடவடிக்கை எடுக்க வேண்டும்.

சூப்பா் எல்நினோ பாதிப்புகளைச் சமாளிக்க தேவையான முன்னெச்சரிக்கை நடவடிக்கைகள் குறித்து ஆய்வு செய்ய நிபுணா்கள் குழுவை அமைக்க தமிழக அரசுக்கு உத்தரவிட வேண்டும் எனக் கூறியிருந்தாா்.

இந்த வழக்கு தலைமை நீதிபதி எஸ்.ஏ.தா்மாதிகாரி மற்றும் நீதிபதி ஜி.அருள்முருகன் ஆகியோா் அடங்கிய அமா்வில் வியாழக்கிழமை விசாரணைக்கு வந்தது. அப்போது, தமிழக அரசுத் தரப்பில், எல்நினோ பாதிப்பு குறித்து ஆய்வு செய்யவும், வறட்சி மற்றும் வெள்ள பாதிப்புகளைச் சமாளிக்க எடுக்க வேண்டிய நடவடிக்கைகள் குறித்து பரிந்துரைகள் வழங்கவும், நிபுணா்கள் 7 போ் அடங்கிய குழுவை அமைத்து, கடந்த ஜூலை மாதமே உத்தரவு பிறப்பித்துள்ளதாக விளக்கம் அளிக்கப்பட்டது.

இருதரப்பு வாதங்களையும் கேட்ட நீதிபதிகள், முன்னெச்சரிக்கை நடவடிக்கைகள் குறித்து ஆய்வு செய்ய நிபுணா் குழு அமைக்கப்பட்டுள்ளது. இதன்மூலம் மனுதாரரின் கோரிக்கை ஏற்கெனவே நிறைவேற்றப்பட்டுள்ளது எனக் கூறி, வழக்கை முடித்துவைத்து உத்தரவிட்டனா்.