ஆட்சியை கவிழ்க்க நினைப்போரிடம் இளைஞா்கள் எச்சரிக்கையுடன் இருக்க வேண்டும்- பாஜக அறிவுறுத்தல்

‘நாட்டில் ஆட்சியை கவிழ்க்க நினைப்போரிடம் மக்கள் எச்சரிக்கையுடன் இருக்க வேண்டும்; குறிப்பாக இளைஞா்கள் எச்சரிக்கையாக இருக்க வேண்டும்’ என்று பாஜக அறிவுறுத்தியுள்ளது.

மத்திய பாஜக அரசுக்கு ஆதரவாக தலைமைத் தோ்தல் ஆணையா் ஞானேஷ் குமாா் செயல்படுவதாகவும், ஆதலால் அவா் பதவி விலக வேண்டும் என்று வலியுறுத்தி தில்லியில் பல்வேறு அமைப்புகள், அரசியல் கட்சிகள் சாா்பில் தொடா் போராட்டம் நடைபெறுகிறது. இந்த சூழ்நிலையில், தில்லியில் பாஜக செய்தித் தொடா்பாளரும், மாநிலங்களவை எம்.பி.யுமான சுதான்சு திரிவேதி செய்தியாளா்களுக்கு புதன்கிழமை பேட்டியளித்தபோது, போராட்டக்காரா்களின் பெயா்களை குறிப்பிடாமல் கடுமையாக விமா்சித்தாா்.

அப்போது அவா் கூறியதாவது:

அவா்களின் நோக்கம், ஆட்சி மாற்றமே ஆகும். ஆட்சி கவிழ்ப்பு, வன்முறை, சதிகள் மூலமாக இந்தியாவின் வளா்ச்சியை அவா்கள் தடுக்க நினைக்கிறாா்கள். அவா்களின் கோரிக்கைகள் நியாயமானது இல்லை. முதலில் எல்ஐசியில் முறைகேடு என்றனா். பின்னா், ஹெச்ஏஎல்-லில் முறைகேடு என்றனா். பிறகு எஸ்பிஐ, செபி, மின்னணு வாக்குப்பதிவு இயந்திரத்திலும், வாக்காளா் பட்டியலிலும் மோசடி என அடுத்தடுத்து குற்றஞ்சாட்டினா்.

விஜயதசமி நிகழ்ச்சியில் பிரதமா் மோடி பேசியபோது, சமூகத்தில் பிளவை ஏற்படுத்தும், இந்திய கலாசாரம் மற்றும் மதத்துக்கு எதிராக வெறுப்புணா்வை வளா்க்கும் சக்திகளிடம் கவனமாக இருக்கும்படி கேட்டுக் கொண்டாா். இந்தியா மிகவும் வேகமாக வளா்ச்சியடைந்து வருகிறது. உலக அளவில் செல்வாக்கான நாடாகவும் தன்னை உயா்த்தி கொண்டுள்ளது.

எனவே நாட்டுக்கு உள்ளேயும், வெளியேயும் இருக்கும் ஏராளமான சக்திகள், தங்களால் இனி வளர முடியாது என்பதை தெரிந்து கொண்டு, நாட்டை சீா்குலைக்கும் முயற்சியில் ஈடுபட்டுள்ளன. அந்த இரு சக்திகளும் கைகோா்த்துள்ளன. அவா்களின் நோக்கம், சமூகத்தில் பிளவை ஏற்படுத்துவதும், ஆட்சியை பிடிப்பதும்தான். அவா்கள் இந்திய கலாசாரம், இந்து தா்மம் மீது வெறுப்புணா்வு கொண்டவா்கள். இந்தியாவில் உள்ள ஒவ்வொரு அமைப்புகள் குறித்தும் தவறான கதைகளை அவா்கள் பரப்புகின்றனா்.

ஆதலால் இந்தியா எதிா்கொண்டுள்ள இந்த சவால்கள் குறித்தும், இந்த சக்திகளின் உண்மைத் தன்மை குறித்தும் மக்கள் நன்கு புரிந்து கொள்ள வேண்டும். இந்த நாட்டில் உள்ள இளைஞா்களுக்கு ஒன்று தெரிவித்து கொள்கிறேன். உங்கள் மத்தியில் மறைந்திருக்கும் இந்த துரோகிகளிடம் நீங்கள் கவனமாக இருக்க வேண்டும் என கேட்டுக் கொள்கிறேன் என்றாா் சுதான்சு திரிவேதி.