மூன்று நாயகர்கள் நடிக்கும் காதல் காதல் காதல் தொடரின் ஒளிபரப்பு தேதி!

விஜய் தொலைக்காட்சியில் ஒளிபரப்பாகவுள்ள காதல் காதல் காதல் தொடரின் ஒளிபரப்பு தேதி குறித்த தகவல் தெரியவந்துள்ளது.

ஒரே தொடரில் 3 காதல் கதைகளை மையப்படுத்தி, வித்தியாசமான பாணியில் புதிய தொடர் எடுக்கப்படுகிறது. இந்தத் தொடருக்கு காதல் காதல் காதல் எனப் பெயரிடப்பட்டுள்ளது.

ஆண், பெண் இடையே உருவாகும் காதலை மையப்படுத்தி தொடர்கள் எடுக்கப்படுவது வழக்கமாக இருந்தாலும், ஒரே தொடரில் 3 காதல்களை பிரதானப்படுத்தி எடுக்கப்படுவது இதுவே முதல் முறை.

ஒரே கதையில் மாறுபட்ட மூன்று ஜோடிகளின் காதல் கதையை விவரிக்கும் திரைக்கதையாக இந்தத் தொடர் எடுக்கப்படுகிறது.

பாரதி கண்ணம்மா தொடரின் முதல் பாகத்தில் நாயகனாக நடித்து பிரபலமான அருண் பிரசாத், மறைந்த நடிகர் மயில்சாமியின் மகன் அன்பு மயில்சாமி, மலையாள சின்ன திரை நடிகர் நலீஃப் கியா ஆகியோர் நாயகர்களாக நடிக்கின்றனர்.

முத்தழகு தொடர் நாயகி ஷோபனா, அண்ணா தொடரில் நடித்து பிரபலமான சுசித்ரா, விஜய் தொலைக்காட்சியில் ஒளிபரப்பான தங்கமகள் தொடரில் நடித்த மனுஸ்ரீ கார்த்திகேயன் ஆகியோர் நாயகிகளாக நடிக்கின்றனர்.

மேலும், பாக்கியலட்சுமி தொடர் சுசித்ரா, ஹார்ட் பீட் இணையத் தொடர் பிரபலம் சந்திரசேகர் ஆகியோர் முக்கிய வேடங்களில் நடிக்கின்றனர்.

இந்த நிலையில், காதல் காதல் காதல் தொடர் வரும் ஜூலை 6 ஆம் தேதி முதல் திங்கள் முதல் வெள்ளி வரை இரவு 10 மணிக்கு ஒளிபரப்பாகும் என்ற தகவல் தெரியவந்துள்ளது.