ஜிம் பயிற்சியாளா் வீட்டில் நகை, பணம் திருட்டு

கடலூா் மாவட்டம், வடலூரில் ஜிம் பயிற்சியாளா் வீட்டில் நகை, பணத்தை திருடிச் சென்ற மா்ம நபா்களை போலீஸாா் தேடி வருகின்றனா்.

வடலூா், ராகவேந்திரா நகரைச் சோ்ந்தவா் சரத்குமாா் (36), ஜிம் பயிற்சியாளா். இவா், திங்கள்கிழமை காலை வீட்டை பூட்டி விட்டு, மனைவியுடன் வெளியே சென்றாா். பின்னா் திரும்பி வந்து பாா்த்தபோது, வீட்டின் பின்பக்கக் கதவு உடைக்கப்பட்டு திறந்து கிடந்ததைக் கண்டு அதிா்ச்சியடைந்தாா்.

பின்னா், உள்ளே சென்று பாா்த்தபோது, பீரோவில் வைக்கப்பட்டிருந்த 4 பவுன் நகைகள், ரூ.57 ஆயிரம் ரொக்கம் ஆகியவை திருடு போனது தெரியவந்தது.

இதுகுறித்து தகவலறிந்த கடலூா் மாவட்ட காவல் கண்காணிப்பாளா் விவேகானந்த சுக்லா சம்பவ இடத்தை பாா்வையிட்டு விசாரணை மேற்கொண்டாா். வடலூா் போலீஸாா் வழக்குப் பதிவு செய்து, விசாரணை நடத்தி வருகின்றனா்.