மக்கள்தொகை கணக்கெடுப்பில் அனைத்து வகை மாற்றுத் திறனாளிகளையும் சோ்க்க வலியுறுத்தல்

மக்கள்தொகை கணக்கெடுப்பில் அனைத்து வகை மாற்றுத்திறனாளிகளையும் சோ்க்க வேண்டும் என தமிழ்நாடு அனைத்து வகை மாற்றுத்திறனாளிகள் மற்றும் பாதுகாப்போா் உரிமைகளுக்கான சங்கத்தினா் வலியுறுத்தியுள்ளனா்.

தஞ்சாவூா் மாவட்ட ஆட்சியரகத்தில் திங்கள்கிழமை நடைபெற்ற மக்கள் குறைதீா் நாள் கூட்டத்தில் சங்கத்தின் மாவட்டச் செயலா் பி.எம். இளங்கோவன் தலைமையில் அளிக்கப்பட்ட மனு:

21 வகையான மாற்றுத்திறனாளிகள் இருக்கும்போது, 2027 மக்கள்தொகை கணக்கெடுப்பில் மத்திய அரசு 9 வகையான மாற்றுத்திறனாளிகளை மட்டும் கணக்கெடுப்பு அட்டவணைப் பட்டியலில் பதிவு செய்துள்ளது. மற்ற 12 வகையான மாற்றுத்திறனாளிகளைப் பட்டியலில் சோ்க்காமல் வஞ்சித்துள்ளது. இதைக் கண்டிப்பதுடன் 21 வகையான மாற்றுத்திறனாளிகளையும் கணக்கெடுப்பு அட்டவணைப் பட்டியலில் சோ்க்க வேண்டும் என தெரிவித்துள்ளனா்.

இந்நிகழ்வில் மாவட்ட துணைத் தலைவா்கள் பழ. அன்புமணி, கோவி. ராதிகா, மாவட்டத் துணைச் செயலா்கள் ராஜன், சாமியப்பன், மாவட்டக் குழு உறுப்பினா்கள் தங்கப்பன், தாமோதரன், மகேஸ்வரி, ராஜா, துரைராஜ், சிந்துபாரதி, விமலநாதன், ராமு உள்ளிட்டோா் கலந்து கொண்டனா்.