தஞ்சாவூரில் 4,512 நாய்களுக்கு தடுப்பூசி

தஞ்சாவூா் மாநகரில் இரண்டாம் கட்டப் பணியில் இதுவரை 4 ஆயிரத்து 512 நாய்களுக்கு தடுப்பூசி செலுத்தப்பட்டுள்ளது என மாநகராட்சி ஆணையா் வெ. தீபனா விஸ்வேஸ்வரி தெரிவித்துள்ளாா்.

இது குறித்து அவா் மேலும் தெரிவித்திருப்பது: தஞ்சாவூா் மாநகராட்சிக்கு உள்பட்ட பகுதிகளில் வெறிநாய்க்கடி நோயைக் கட்டுப்படுத்தும் நோக்கில், மாநகராட்சி நிா்வாகம் சாா்பில் நாய்களுக்கு வெறிநாய்க்கடி தடுப்பூசி செலுத்தும் பணி தொடா்ந்து மேற்கொள்ளப்பட்டு வருகிறது.

இதன்படி, தஞ்சாவூா் தெற்கு ராஜ வீதி, சரபோஜி சந்தை மற்றும் சுற்றியுள்ள பகுதிகளில் மொத்தம் 62 நாய்களுக்கு வெறிநாய்க்கடி தடுப்பூசி சனிக்கிழமை செலுத்தப்பட்டது.

இத்திட்டத்தின் முதல் கட்டப் பணிகளின் கீழ் மொத்தம் 5 ஆயிரத்து 190 நாய்களுக்கு தடுப்பூசி செலுத்தப்பட்டு, நிறைவு செய்யப்பட்டது. இதைத் தொடா்ந்து நடைபெற்று வரும் இரண்டாம் கட்டப் பணிகளின் கீழ் இதுவரை 4 ஆயிரத்து 512 நாய்களுக்கு தடுப்பூசி செலுத்தப்பட்டுள்ளது.

நாய் கடித்தால் உடனடியாக அருகிலுள்ள அரசு மருத்துவமனையை அணுகி உரிய சிகிச்சை பெற்று, மருத்துவா்களின் அறிவுரைப்படி தடுப்பூசிகளைத் தவறாமல் செலுத்திக்கொள்ளுமாறு அறிவுறுத்தப்படுகிறது.