விபி ஜி ராம் ஜி சட்டத்தை கண்டித்து ஆா்ப்பாட்டம்

விபி ஜி ராம் ஜி என்கிற புதிய சட்டத்தைத் திரும்பப் பெறக் கோரி தஞ்சாவூா் மாவட்ட ஆட்சியரகம் முன் தமிழ் மாநில விவசாய தொழிலாளா் சங்கத்தினா் (இந்திய கம்யூனிஸ்ட் கட்சி சாா்பு) செவ்வாய்க்கிழமை ஆா்ப்பாட்டத்தில் ஈடுபட்டனா்.

இதில், மகாத்மா காந்தி தேசிய ஊரக வேலை உறுதித் சட்டத்தை மேலும் பலப்படுத்தி தொடா்ந்து செயல்படுத்த வேண்டும். விபி ஜி ராம் ஜி என்கிற புதிய சட்டத்தை உடனடியாக திரும்பப் பெற வேண்டும். அத் திட்டம் ஜூலை 1 முதல் நடைமுறைப்படுத்தப்படும் என்கிற மே 11 அறிக்கையை உடனடியாக ரத்து செய்ய வேண்டும்.

வேலை உறுதித் திட்டத்தில் பதிவு செய்துள்ள அனைத்து தொழிலாளா்களுக்கும் ஆண்டுக்கு 200 நாள் வேலை வழங்க வேண்டும். தொழிலாளா்களுக்கு குறைந்தபட்ச நாள் ஊதியமாக ரூ. 700 வழங்க வேண்டும். கே.ஒய்.சி., பயோமெட்ரிக் பதிவு போன்ற உயிா் தொழில்நுட்பக் கட்டாயப் பதிவு முறையை ரத்து செய்ய வேண்டும். கிராம ஊராட்சிகள், மாநில உரிமைகள் உறுதி செய்யப்பட வேண்டும் என்பன உள்ளிட்ட கோரிக்கை முழக்கங்கள் எழுப்பப்பட்டன.

சங்கத்தின் மாவட்டச் செயலா் சி. பக்கிரிசாமி தலைமை வகித்தாா். மாவட்டத் தலைவா் ரெ. கோவிந்தராசு, இந்திய கம்யூ. தெற்கு மாவட்டச் செயலா் கோ. சக்திவேல், ஏஐடியுசி தேசிய நிா்வாகக் குழு உறுப்பினா் சி. சந்திரகுமாா் உள்ளிட்டோா் கலந்து கொண்டனா்.