தாதம்பாளையம் ஏரி விரைவில் வனத்துறையிடமிருந்து மீட்கப்படும்! - கே. அண்ணாமலை

தாதம்பாளையம் ஏரி விரைவில் வனத்துறையிடம் இருந்து மீட்கப்படும் என்றாா் வீ த லீடா்ஸ் அமைப்பின் தலைவா் கே. அண்ணாமலை.

கரூா் மாவட்டம் பெரியதாதம்பாளையம் ஏரியை வனத்துறையிடம் இருந்து மீட்கும் விழிப்புணா்வு நடைபயணம் வீ த லீடா்ஸ் அமைப்பு சாா்பில் ஞாயிற்றுக்கிழமை மாலை நடைபெற்றது. நிகழ்ச்சியில் அமைப்பின் தலைவா் கே. அண்ணாமலை தலைமையில் அமைப்பினா் திரளாக பங்கேற்று, பெரியதாதம்பாளையத்தில் இருந்து பள்ளமருதப்பட்டி வரை 6 கி.மீ. நடைபயணமாக சென்றனா்.

பின்னா் அண்ணாமலை செய்தியாளா்களிடம் கூறியது: அமராவதி ஆற்றில் இருந்து வரும் உபரிநீா் ஆண்டிசெட்டிபாளையம் வழியாக பெரியதாதம்பாளையம் ஏரிக்கு வந்துகொண்டிருந்தது. ஆனால் ஆற்றில் தண்ணீா் வராமல் ஏரிக்கும் தண்ணீா் வராமல் போனதால் வனத்துறை கட்டுப்பாட்டுக்கு இந்த ஏரி சென்றுவிட்டது.

இந்த ஏரியை மீட்டெடுத்தால் ஆண்டிசெட்டிபாளையம் முதல் தாதம்பாளையம் ஏரி வரை உள்ள 33 குளங்கள் தண்ணீரால் நிரம்பும். 125 ஏக்கா் கொண்ட இந்த ஏரி நிரம்பும்போது இந்த பகுதியில் உள்ள கிணறுகளில் நீா்மட்டம் உயரும். வறட்சியாக இருக்கும் க.பரமத்தி பகுதி செழிப்படையும். எனவே வனத்துறையின் கட்டுப்பாட்டில் உள்ள இந்த ஏரியை மீட்டெடுக்க அரசிடம் கோரிக்கை வைக்க உள்ளோம்.

வனத்துறையின் கட்டுப்பாட்டுக்கு ஏரி எப்படி சென்றது என்பதை ஆய்வு செய்து பின்னா் ஏரியை வனத்துறையிடமிருந்து மீட்டெடுத்து பொதுமக்களிடம் ஒப்படைக்க உள்ளோம். இன்னும் 10 நாள்களுக்குள் தமிழக பொதுப்பணித்துறை அமைச்சா், நீா்வளத்துறை அமைச்சரை சந்தித்து கோரிக்கை மனு வழங்க உள்ளோம்.

ஏற்கெனவே தாதம்பாளையம் ஏரிக்குரிய இடத்திற்கு பதில், சேலம் மாவட்டத்தில் உள்ள இடத்தை ஒப்படைக்கும் வகையில் இருமாவட்ட ஆட்சியா்களும் மத்திய வனத்துறைக்கு கடிதம் ஏற்கனவே அனுப்பி வைத்துள்ளனா்.

எனவே, விரைவில் இந்த தாதம்பாளையம் ஏரி வனத்துறையிடம் இருந்து மீட்கப்படும் என்றாா் அவா். தமிழகம் முழுவதும் நீா்நிலைகளை சுத்தப்படுத்தி, தூா்வாரிடும் வேலையில் வீ த லீடா்ஸ் அமைப்பு செயல்படும் என்றாா் அவா்.