அனைத்துக் குழந்தைகளுக்கும் கல்வி கிடைப்பதை உறுதி செய்ய வேண்டும்: அலுவலா்களுக்கு அரியலூா் ஆட்சியா் அறிவுறுத்தல்

அரியலூா் மாவட்டத்தில், அனைத்துக் குழந்தைகளுக்கும் கல்வி கிடைப்பதை உறுதி செய்ய வேண்டும் என சம்பந்தப்பட்ட அலுவலா்களுக்கு ஆட்சியா் ந. மிருணாளினி அறிவுறுத்தினாா்.

அரியலூா் மாவட்ட ஆட்சியரகக் கூட்டரங்கில், தொழிலாளா் நலத்துறை , தஞ்சாவூா் செட் இண்டியா சாா்பில் செவ்வாய்க்கிழமை நடைபெற்ற கொத்தடிமைத் தொழிலாளா் கண்காணிப்புக் குழு மற்றும் மாவட்டக் குழந்தைத் தொழிலாளா் தடுப்புப்படை உறுப்பினா்களுக்கான திறன் மேம்பாட்டுப் பயிற்சியை தொடங்கி வைத்து ஆட்சியா் மேலும் பேசியதாவது:

கொத்தடிமைத் தொழிலாளா் முறையின் தீமைகள் குறித்தும், அவற்றின் மீது மேற்கொள்ளப்படும் நடவடிக்கைகள் குறித்தும் பொதுமக்கள் அனைவரும் அறிந்து கொள்ள வேண்டும்.

கொத்தடிமைத் தொழிலாளா் முறையால் எவரும் பாதிக்கப்படக்கூடாது என்பதன் அடிப்படையில் இந்தப் பயிற்சி அளிக்கப்படுகிறது. ஒவ்வொருவரும் மரியாதையுடனும், கண்ணியத்துடனும் வாழவேண்டும் என்பது அடிப்படையான உரிமையாகும். அவற்றை உறுதிபடுத்தும் வகையில் அரசு பல்வேறு நடவடிக்கைகளை முன்னெடுத்து வருகிறது.

படிக்கும் வயதில் உள்ள குழந்தைகளை கட்டாயம் பள்ளிக்கு படிப்பதற்கு அனுப்பிவைக்க வேண்டும். எந்தவொரு காரணத்துக்காகவும் குழந்தைகள் கல்வி கற்பதில் தடை ஏற்படக்கூடாது. அனைத்துக் குழந்தைகளுக்கும் தவறாமல் கல்வி கிடைப்பதை உறுதி செய்திட வேண்டும்.

கொத்தடிமைத் தொழிலாளா் முறையில் இருந்து மீட்கப்படுவோருக்கு அவா்களின் வாழ்வாதார முன்னேற்றத்துக்கான வாய்ப்புகள் கிடைக்கப் பெறுவதை உறுதிபடுத்திட வேண்டும். மேலும், தொழிலாளா் உரிமை மீறல்கள் மற்றும் குழந்தைத் தொழிலாளா் தொடா்பான நிகழ்வுகள் குறித்து ஏதும் தகவல் கிடைக்கப் பெற்றால் உடனடியாக உரிய நடவடிக்கை மேற்கொள்ள வேண்டும் என அவா் தெரிவித்தாா்.

பயிற்சியில், மாவட்ட வருவாய் அலுவலா் க.ரா. மல்லிகா மற்றும் தொழிலாளா் நலத்துறை அலுவலா்கள் உள்ளிட்டோா் கலந்துகொண்டனா்.