கள்ளச் சாராயம் காய்ச்சியவா் குண்டா் சட்டத்தில் கைது

அரியலூா் மாவட்டம், செந்துறை அருகே கள்ளச் சாராயம் காய்ச்சியவா் குண்டா் சட்டத்தில் திங்கள்கிழமை கைது செய்யப்பட்டாா்.

செந்துறையை அடுத்த குமிழியம் மேலத்தெருவைச் சோ்ந்தவா் ராமலிங்கம் மகன் விபீஷ்ணன் (49). இவா் கடந்த 2020-ஆம் ஆண்டு கள்ளச் சாரயம் காய்ச்சியதற்காக கைது செய்யப்பட்டாா்.

இந்நிலையில் இவா், கடந்த 7.10.2026 அன்று வடக்கு இரும்புலிக்குறிச்சி-குன்னந்தோண்டி சாலை அருகே கள்ளச்சாராயம் காய்ச்சுவதற்காக ஊறல் போட்டு வைத்திருந்தாா். இதையறிந்த அரியலூா் மதுவிலக்கு அமலாக்கப்பிரிவு காவல்துறையினா் விபீஷ்ணனை கைது செய்து திருச்சி மத்திய சிறையில் அடைத்தனா்.

தொடா்ந்து கள்ளச்சாராயத் தொழிலில் ஈடுபட்டு வந்த விபீஷ்ணன் மீது குண்டா் தடுப்புச் சட்டத்தின் கீழ் நடவடிக்கை எடுக்கக் கோரி, அரியலூா் மதுவிலக்கு அமலாக்கப் பிரிவு காவல் ஆய்வாளா் சாந்தி, அரியலூா் காவல் துறை கண்காணிப்பாளருக்கு பரிந்துரை செய்தாா்.

இதையடுத்து அவா் மாவட்ட ஆட்சியா் ந.மிருணாளினிக்கு பரிந்துரைத்தாா். இந்நிலையில், அவரை குண்டா் தடுப்புச் சட்டத்தில் கைது செய்ய ஆட்சியா் திங்கள்கிழமை உத்தரவிட்டாா். இதன் நகலை திருச்சி மத்திய சிறை அதிகாரிகளிடம் அரியலூா் மதுவிலக்கு அமலாக்கப் பிரிவு காவல் துறையினா் வழங்கினா்.