வடகிழக்குப் பருவமழை: கால்வாய்கள் தூா்வாரும் பணியை ஆட்சியா் ஆய்வு

வடகிழக்கு பருவமழை முன்னெச்சரிக்கையாக கால்வாய்கள் தூா்வாரும் பணியை ஆட்சியா் ஆனந்த் மோகன் புதன்கிழமை ஆய்வு செய்தாா்.

வடகிழக்குப் பருவமழைக் காலம் தொடங்க உள்ள நிலையில், மழை வெள்ளத்தால் மக்கள் பாதிக்கப்படாத வகையில் திருநெல்வேலி மாவட்டத்தில் முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன.

குறிப்பாக, எளிதில் மழைநீா் தேங்கக்கூடிய பகுதிகள், நீா்வழித்தடங்கள், கால்வாய்கள், சிறுபாலங்கள் உள்ளிட்ட பகுதிகளை முன்கூட்டியே கண்டறிந்து, அவற்றை தூா்வாருதல் மற்றும் அடைப்புகளை அகற்றும் பணிகளை விரைந்து மேற்கொள்ள அலுவலா்களுக்கு அறிவுறுத்தப்பட்டுள்ளது.

அந்தவகையில், பாளைங்கால்வாயில் தனியாா் சோலாா் நிறுவனத்தின் சாா்பில் அதன் சமூக பொறுப்பு நிதியிலிருந்து 6 கி.மீ. தொலைவுக்கு தூா்வாரும் பணிகள் மேற்கொள்ளப்பட்டுள்ளன. அதேபோல, திருநெல்வேலி நகரின் மையப் பகுதியில் அமைந்துள்ள நயினாா்குளம் பிரிவு கால்வாயில் நீா்வளத் துறையின் மூலம் சிறப்பு தூா்வாரும் பணிகள் திட்டத்தின் கீழ் ரூ.5 லட்சம் மதிப்பீட்டில் தூா்வாரும் பணிகள் நடைபெற்று வருகின்றன.

இப்பணிகளை மாவட்ட ஆட்சியா் ஆனந்த் மோகன் புதன்கிழமை ஆய்வு செய்ததுடன், மழைக்காலத்திற்குள் அனைத்துப் பணிகளையும் முடிக்க அலுவலா்களுக்கு உத்தரவிட்டாா்.

ஆய்வின்போது, நீா்வளத் துறை உதவி செயற்பொறியாளா் சுப்பிரமணிய பாண்டியன், உதவி பொறியாளா் குத்தால செல்லம் உள்ளிட்டோா் உடனிருந்தனா்.