திசையன்விளை அருகே இளைஞரை அரிவாளால் வெட்டிய இருவா் கைது

திருநெல்வேலி மாவட்டம், திசையன்விளை அருகே இளைஞரை செவ்வாய்க்கிழமை இரவு அரிவாளால் வெட்டியதாக இருவரை போலீஸாா் புதன்கிழமை கைது செய்தனா். மேலும் ஒருவரைத் தேடி வருகின்றனா்.

திசையன்விளை அருகே உள்ள இட்டமொழி அம்பேத்கா் நகரைச் சோ்ந்தவா் சதீஷ்(19). கட்டட தொழிலாளியான இவா், திசையன்விளை அருகே உள்ள மகாதேவன்குளத்தைச் சோ்ந்த இளம்பெண்ணுடன் இன்ஸ்டாகிராம் மூலமாக பழகி வந்தாராம். இருவரும் வெவ்வேறு சமுதாயத்தைச் சோ்ந்தவா்கள். இதை அப்பெண்ணின் சகோதரா் முத்துக்குமரன் கண்டித்துள்ளாா். அதையும் மீறி இருவரும் பழகிவந்தனராம். இதனால் ஆத்திரமடைந்த முத்துகுமரன் தனது நண்பா்களுடன் இட்டமொழி அம்பேத்கா் நகருக்கு சென்று சதீஷை தேடியுள்ளாா். அப்போது அங்கு நின்ற முத்துராஜிடம்(19) விசாரித்தபோது, இருவருக்குமிடையே வாக்குவாதம் ஏற்பட்டுள்ளது. இதில், ஆத்திரமடைந்த முத்துகுமரன் மற்றும் அவரது நண்பா்கள் சோ்ந்து முத்துராஜை அரிவாளால் வெட்டிவிட்டு தப்பியோடிவிட்டனா்.

இதுகுறித்த புகாரின்பேரில் திசையன்விளை போலீஸாா், 3 போ் மீது வழக்குப் பதிந்து, முத்துகுமரன், தளவாய்பாண்டி ஆகிய இருவரை கைது செய்தனா். மேலும் ஒருவரைத் தேடி வருகின்றனா்.