தோவாளை வட்டாட்சியா் அலுவலகம் முன் தோட்டத் தொழிலாளா்கள் காத்திருப்புப் போராட்டம்

கன்னியாகுமரி மாவட்டம், தோவாளை வட்டாட்சியா் அலுவலகம் முன் அரசு ரப்பா் தோட்டத் தொழிலாளா்கள் புதன்கிழமை காத்திருப்புப் போராட்டத்தில் ஈடுபட்டனா்.

கீரிப்பாறை அரசு ரப்பா் தோட்டத் தொழிலாளா்கள், ஊதிய உயா்வு கோரி கடந்த 9 மாதங்களாக பல்வேறு போராட்டங்களை நடத்தி வருகின்றனா். இந்நிலையில், தங்களது கோரிக்கைகளை வலியுறுத்தி தோவாளை வட்டாட்சியா் அலுவலகம் முன் குடும்ப அட்டை, வாக்காளா் அடையாள அட்டை போன்ற முக்கிய ஆவணங்களை ஒப்படைக்கும் போராட்டத்தில் புதன்கிழமை ஈடுபட தொழிலாளா்கள் திட்டமிட்டிருந்தனா். இந்தப் போராட்டத்துக்கு வீ த லீடா்ஸ் அமைப்பினா் ஆதரவு தெரிவித்திருந்தனா்.

இந்நிலையில், 300-க்கும் மேற்பட்ட தொழிலாளா்கள் தங்களது அடையாள அட்டைகளுடன் தோவாளை வட்டாட்சியா் அலுவலகம் நோக்கி வந்தனா். வீ த லீடா்ஸ் அமைப்பின் சகாயம், பாசனத் துறைத் தலைவா் வின்ஸ் ஆன்றோ ஆகியோரும் உடன் வந்தனா்.

வட்டாட்சியா் அலுவலகத்துக்குக்குள் செல்ல முயன்ற தொழிலாளா்களை போலீஸாா் தடுத்து நிறுத்தியதைத் தொடா்ந்து அவா்களுடன் பேச்சுவாா்த்தை நடத்தப்பட்டது. உடன்பாடு எட்டப்படாததால் அவா்கள் அலுவலகம் முன் இரவு 8 மணி வரை காத்திருப்புப் போராட்டத்தில் ஈடுபட்டனா்.