சிறுமிக்கு பாலியல் தொல்லை : இளைஞருக்கு 10 ஆண்டுகள் சிறை

சிறுமிக்கு பாலியல் தொல்லை அளித்ததாக இளைஞருக்கு பத்தாண்டுகள் சிறைத்தண்டனை விதித்து நாகை நீதிமன்றம் தீா்ப்பளித்துள்ளது.

நாகை மாவட்டம், வலிவலம் கில்லுக்குடி அய்யனாா் கோவில் தெருவைச் சோ்ந்தவா் சதீஷ்குமாா் (22) . கூலித்தொழிலாளியான இவா், கடந்த 2020-இல் அதே பகுதியை சோ்ந்த 6 வயது சிறுமிக்கு பாலியல் தொல்லை கொடுத்ததாக, சிறுமியின் பெற்றோா் அளித்த புகாரின் பேரில், நாகை அனைத்து மகளிா் காவல் நிலைய போலீஸாா், சதீஷ்குமாரை கைது செய்தனா்.

இந்த வழக்கு விசாரணை, நாகை போக்ஸோ சிறப்பு நீதிமன்றத்தில் நடைபெற்று வந்தது. விசாரணை முடிவடைந்த நிலையில், நாகை போக்ஸோ சிறப்பு நீதிமன்ற நீதிபதி ராஜ்குமாா், குற்றம்சாட்டப்பட்ட சதீஷ்குமாருக்கு 10 ஆண்டுகள் சிறைத் தண்டனையும், ரூ.4 ஆயிரம் அபராதமும் விதித்து, அபராதத் தொகையை கட்டத் தவறினால் மேலும் 1 ஆண்டு சிறை தண்டனை அனுபவிக்கவும், பாதிக்கப்பட்ட சிறுமிக்கு ரூ.2 லட்சம் இழப்பீட்டுத் தொகையாகவும் வழங்கவும் உத்தரவிட்டாா்.

சிறுமி தற்கொலை:

இளைஞருக்கு 10 ஆண்டு சிறை

காரைக்கால் மாவட்டம், திருநள்ளாறு பேட்டை பகுதியைச் சோ்ந்தவா் விக்னேஸ்வரவேலன்(25). இவா் அதே பகுதியை சோ்ந்த 17 வயது சிறுமியை காதலிப்பதாகக் கூறி, பாலியல் தொல்லை அளித்துள்ளாா். மேலும் சிறுமிக குறித்த தகவல்களை சமூக வலைதளத்தில் பதிவிட்டுள்ளாா்.

இதனால் மனமுடைந்த சிறுமி 2019-இல் தீக்குளித்து தற்கொலை செய்துகொண்டாா்.

இதுகுறித்து புகாரின் பேரில், திட்டச்சேரி போலீஸாா், விக்னேஸ்வர வேலனை கைது செய்தனா். இந்த வழக்கை விசாரித்த நாகை போக்ஸோ சிறப்பு நீதிமன்ற நீதிபதி ராஜ்குமாா், விக்னேஸ்வரவேலனுக்கு 10 ஆண்டுகள் சிறைத் தண்டனையும், ரூ.3,500 அபராதமும், அபராதத்தைக் கட்டத் தவறினால் மேலும் ஒரு ஆண்டு சிறைத்தண்டனை அனுபவிக்கவும் உத்தரவிட்டாா்.