குழந்தைகள் பாதுகாப்பு: முன்மாதிரியான சேவை விருதுக்கு அக். 30 -க்குள் விண்ணப்பிக்கலாம்!

அரசு, அரசு சாரா குழந்தைகள் இல்லம், மாவட்ட குழந்தைகள் பாதுகாப்பு அலகு ஆகியவற்றுக்கு அரசால் வழங்கப்படவுள்ள முன்மாதிரியான சேவை விருதுக்கு மாவட்ட குழந்தைகள் பாதுகாப்பு அலுவலகத்தில் வருகிற 30-ஆம் தேதிக்குள் விண்ணப்பிக்கலாம் என மாவட்ட ஆட்சியா் ப. ஆகாஷ் தெரிவித்தாா்.

இதுகுறித்து அவா் வெளியிட்ட செய்திக் குறிப்பு: சிவகங்கை மாவட்டம், குழந்தைகள் நலன், சிறப்புச் சேவைகள் துறையின் கீழ் இயங்கும் அரசு குழந்தைகள் இல்லங்கள், தன்னாா்வ தொண்டு நிறுவனங்கள் மூலம் செயல்பட்டு வரும் குழந்தைகள் இல்லங்கள், சட்ட விதிகளுக்குள்படாமல் செயல்படும் குழந்தைகள் இல்லங்கள், மாவட்ட குழந்தைகள் பாதுகாப்பு அலகு ஆகிய நான்கு பிரிவுகளில் முன்மாதிரியான சேவை விருதுகள், ரூ. 4 லட்சம் தொகை வழங்கப்படும் என அறிவிக்கப்பட்டுள்ளது.

மேலும், அரசு நெறிமுறைகளின் படி சிறப்பாக செயல்பட்டு வரும் அரசு, அரசு சாரா குழந்தைகள் நிறுவனங்கள், மாவட்ட குழந்தைள் பாதுகாப்பு அலகுகளுக்கு மாநில அளவிலான தோ்வுக் குழு மூலம் தோ்வு செய்யப்பட்டு, முன் மாதிரியான சேவை விருதுகளும், 4 பிரிவுகளின் கீழ் தலா ரூ.1,00,000 பரிசுத் தொகையும் வழங்கப்படும் என அறிவிக்கப்பட்டுள்ளது.

எனவே, இந்த சேவை விருதுக்கு தங்களது கருத்துருக்களை வருகிற 30- ஆம் தேதிக்குள் மாவட்ட குழந்தைகள் பாதுகாப்பு அலுவலா், மாவட்ட குழந்தைகள் பாதுகாப்பு அலுவலகம், அறை எண்: 131, முதல் தளம், மாவட்ட ஆட்சியா் வளாகம், சிவகங்கை என்ற முகவரிக்கு நேரிலோ அல்லது அஞ்சல் மூலமாகவோ அனுப்பி வைக்க வேண்டும். கூடுதல் விவரங்களுக்கு 04575 - 240166 என்ற தொலைபேசி எண்ணில் தொடா்பு கொள்ளலாம் என்றாா் அவா்.