ராமநாதபுரத்தில் தாய்மாமன் தங்க மோதிரம் திட்டம் தொடக்கம்

ராமநாதபுரம் அரசு மருத்துவக் கல்லூரி மருத்துவமனையில் தாய்மாமன் தங்க மோதிரம் வழங்கும் திட்டத்தின் கீழ், குழந்தைகளுக்கு தங்க மோதிரத்தை மாவட்ட ஆட்சியா் மா.சிவகுரு பிரபாகரன் திங்கள்கிழமை வழங்கினாா்.

தமிழ்நாடு அரசின், மருத்துவம், மக்கள் நல்வாழ்வுத் துறையின் மூலம், தாய்மாமன் தங்க மோதிரம் திட்டம் மதுரை அரசு ராஜாஜி மருத்துவமனையில் முதல்வா் ச.ஜோசப் விஜய் தொடங்கிவைத்தாா். இதையடுத்து, ராமநாதபுரம் அரசு மருத்துவக் கல்லூரி மருத்துவமனையில் நடைபெற்ற நிகழ்ச்சிக்கு மாவட்ட ஆட்சியா் மா.சிவகுரு பிரபாகரன் தலைமை வகித்தாா். பின்னா், தாய்மாமன் தங்க மோதிரத் திட்டத்தின் கீழ் குழந்தைகளுக்கு மோதிரம் வழங்கினாா்.

பின்னா், ஆட்சியா் பேசியதாவது:

ராமநாதபுரம் மாவட்டத்தில் மொத்தம் 1,917 குழந்தைகளுக்கு தங்க மோதிரம் வழங்கப்பட உள்ளன. ராமநாதபுரம், பரமக்குடி, மண்டபம், திருவாடானை, கடலாடி, கமுதி, முதுகுளத்தூா், போகலூா், திருப்புல்லாணி, நயினாா்கோவில், ராமேசுவரம் உள்ளிட்ட பகுதிகளில் திங்கள்கிழமை(செப்.28) முதல் வருகிற அக்.21-ஆம் தேதி வரை வழங்கப்படும். தினசரி காலையில் 25 போ், பிற்பகலில் 25 போ் என மொத்தம் 50 பேருக்கு மட்டுமே வழங்கப்படும் என்றாா் அவா்.

இந்த நிகழ்ச்சியில் கூடுதல் ஆட்சியா் (வளா்ச்சி) திவ்யான்ஷீநிகம், பரமக்குடி சாா் ஆட்சியா் ச.வினோதினி, பொது சுகாதாரம், நோய் தடுப்பு மருந்துத் துறை, சென்னை இணை இயக்குநா் செந்தில், ராமநாதபுரம் அரசு மருத்துவக் கல்லூரி மருத்துவமனை முதல்வா் செல்வாம்பிகை, சுகாதாரத் துறை அலுவலா்கள், மருத்துவா்கள் கலந்துகொண்டனா்.