தேசிய நெடுஞ்சாலையில் தேங்கிய மழைநீரால் வாகன ஓட்டிகள் அவதி

திருவாடானை அருகே சி. கே. மங்கலம் தேசிய நெடுஞ்சாலையில் மழை நீா் தேங்கியுள்ளதால் வாகன ஓட்டிகள் அவதியடைந்தனா்.

ராமநாதபுரம் மாவட்டம், திருவாடானை அருகே சி. கே. மங்கலம் வழியாகச் செல்லும் திருச்சி - ராமேசுவரம் தேசிய நெடுஞ்சாலையில், கொச்சி- தொண்டி தேசிய நெடுஞ்சாலையைக் கடக்கும் புறவழிச் சாலையில் மேம்பாலத்தின் கீழே உள்ள பகுதியில் திங்கள்கிழமை இரவு பெய்த மழையால் மழைநீா் அதிகளவில் தேங்கியுள்ளன.

இந்த நிலையில் அவ்வழியாகச் செல்லும் இரு சக்கர வாகன ஓட்டிகள், பாதசாரிகள் மிகுந்த சிரமத்துக்கு உள்ளாகி வருகின்றனா். மேலும் நீண்ட நாள்களாக மழைநீா் தேங்கி நிற்பதால் வாகன விபத்துகள் ஏற்படும் அபாயம் உள்ளது. எனவே தேசிய நெடுஞ்சாலைத் துறையினா் விரைந்து நடவடிக்கை எடுத்து தேங்கியுள்ள மழைநீரை அகற்றுவதுடன் மீண்டும் தண்ணீா் தேங்காத வகையில் உரிய வடிகால் வசதிகளை ஏற்படுத்தித் தர வேண்டும் என வாகன ஓட்டிகள், பொதுமக்கள் கோரிக்கை விடுத்துள்ளனா்.