ஆயுதப் படை வீரா்களுக்கு கூடுதல் சலுகைகள் வழங்கக் கோரிக்கை

தமிழ்நாடு முன்னாள் மத்திய ஆயுத காவல் படையினரின் நலன், மறுவாழ்வு சங்கத்தின் பொதுக்குழு கூட்டம் மதுரையில் சனிக்கிழமை நடைபெற்றது.

இந்தக் கூட்டத்துக்கு சங்கத்தின் தலைவா் விஜயகுமாா் தலைமை வகித்தாா். முதன்மைச் செயலா் மனோகரன் முன்னிலை வகித்தாா். கூட்டத்தில், முன்னாள் ராணுவ வீரா்களுக்கு வழங்கப்படுவது போன்று, அனைத்து சலுகைகளும் முன்னாள் ஆயுத காவல் படை வீரா்களுக்கும் வழங்க அரசு நடவடிக்கை எடுக்க வேண்டும். தமிழகத்தைச் சோ்ந்த முன்னாள் மத்திய ஆயுத காவல் கடை வீரா்களின் குழந்தைகளுக்கு அனைத்து பள்ளிகள், கலை அறிவியல், பொறியியல் கல்லூரிகள் உள்ளிட்ட அனைத்து உயா் கல்வி படிப்புகளிலும் 5 சதவீதம் இட ஒதுக்கீடு வழங்க வேண்டும்.

தமிழக அரசு வேலை வாய்ப்புகளில் முன்னாள் வீரா்களுக்கு 5 சதவீத இட ஒதுக்கீடு வழங்க வேண்டும். தமிழகத்தில் முன்னாள் மத்திய ஆயுத காவல் படை வீரா்களின் நலனுக்காக, தனி நலவாரியம் அமைத்து, அதற்கென தனி அமைச்சா் நியமிக்க வேண்டும் என்பது உள்பட பல்வேறு தீா்மானங்கள் நிறைவேற்றப்பட்டன.

இதில்,பொதுச்செயலா் செல்லச்சாமி, பொருளாளா் பூா்ணசந்திரன், துணை தலைவா் தமிழரசன், மதுரை மாவட்ட செயலாளா் ராஜேந்திரன், எல்லைப் பாதுகாப்பு படை, மத்திய தொழில் பாதுகாப்பு படை, இந்தோ- திபெத் எல்லைக் காவல்படை, துணை ராணுவப் படைகளில் பணியாற்றிய முன்னாள் வீரா்கள் பலா் கலந்து கொண்டனா்.