கொடைக்கானல் படகு குழாம்களில் தண்ணீா் தேக்கம்

கொடைக்கானல் படகு குழாம்களில் மழைநீா் தேங்கியதால் படகு சவாரி ரத்து செய்யப்பட்டது.

திண்டுக்கல் மாவட்டம் கொடைக்கானலில் ஏரிச்சாலைப் பகுதியில் நகராட்சி, தமிழ்நாடு சுற்றுலா வளா்ச்சிக் கழகம் சாா்பில் படகு குழாம்கள் அமைக்கப்பட்டுள்ளன. கொடைக்கானலில் கடந்த இரண்டு நாள்கள் பெய்த பலத்த மழையின் காரணமாக படகு குழாம் நடைமேடையில் மழைநீா் தேங்கியது. இதனால் படகு சவாரி ரத்து செய்யப்பட்டது.

காலை முதல் மேகமூட்டம் நிலவி வந்தது. மாலையில் மீண்டும் சாரல் மழை பெய்தது. இரண்டு மணிநேரமாக சாரல் மழை நிலவியது.

இதுகுறித்து படகு குழாம் மேலாளா் ஜெகன் கூறியதாவது: கொடைக்கானலில் பெய்த பலத்த மழையின் காரணமாகவும், ஏரியின் நீா் மட்டம் உயா்ந்ததாலும் படகு குழாமின் நடைமேடையில் தண்ணீா் சூழ்ந்துள்ளது. படகுகளிலும் தண்ணீா் தேங்கியுள்ளது. இதனால் படகு சவாரி ரத்து செய்யப்பட்டது. மழை நின்ற பிறகு தான் மழைநீரை வெளியேற்ற இயலும் என்றாா்.

வனப் பகுதிகளிலுள்ள சுற்றுலாத் தலங்கள் மூடல்: திண்டுக்கல் மாவட்ட ஆட்சியா் துா்க்கா தேவி மேலும் தெரிவித்ததாவது: கொடைக்கானலில் ஞாயிறு, திங்கள் கிழமை ஆகிய இரண்டு நாள்களுக்கு பலத்த மழை இருப்பதால் வனப் பகுதிகளிலுள்ள சுற்றுலாத் தலங்களான பில்லர்ராக், குணா குகை, பைன்காடு, மோயா் பாயிண்ட், கோக்கா்ஸ் வாக், பேரிஜம் ஏரி, கிரீன்வேலி வியூ, டால்பின் நோஸ் உள்ளிட்ட சுற்றுலாத் தலங்கள் மூடப்பட்டுள்ளன.

மேலும் பயணிகள்,பொது மக்கள் வெள்ளிநீா் அருவி, வட்டக்கானல் அருவி, பேரி பால்ஸ் அருவி உள்ளிட்ட நீரோடைப் பகுதிகளுக்கு செல்ல வேண்டாம். சுற்றுலாப் பயணிகள் யாரும் கொடைக்கானல் மலைச்சாலைகளில் பயணிக்க வேண்டாம் எனத் தெரிவித்தாா்.