சேலம் வழியாக சென்ற ரயில்களில் கடத்தப்பட்ட கஞ்சா பறிமுதல்

சேலம் வழியாக சென்ற ரயில்களில் கடத்தப்பட்ட 19 கிலோ கஞ்சாவை தனிப்படை போலீஸாா் ஞாயிற்றுக்கிழமை பறிமுதல் செய்தனா்.

ஒடிஸா, ஆந்திர மாநிலங்களில் இருந்து தமிழகம் வழியாக கேரளம் செல்லும் ரயில்களில் கஞ்சா கடத்தப்படுகிறது. இதைத் தடுக்க ரயில்வே போலீஸாா் தனிப்படை அமைத்து சோதனையிடுகின்றனா்.

அந்தவகையில், ஞாயிற்றுக்கிழமை காலை பாட்னா - எா்ணாகுளம் விரைவு ரயிலில் காட்பாடியில் இருந்து சேலம் வரை தனிப்படையினா் சோதனையிட்டனா். இதில், பின்பக்க முன்பதிவில்லா பொதுப்பெட்டியில் சாக்குப்பை கேட்பாரற்று கிடந்தது. அதைத் திறந்து பாா்த்தபோது, அதில் 13 கிலோ கஞ்சா இருந்தது. இதையடுத்து அந்தப் பெட்டியில் இருந்த பயணிகளிடம் விசாரணை நடத்தினா். ஆனால் அதனைக் கடத்தி வந்த நபா் யாா் என தெரியவில்லை.

இதேபோல் மாதா வைஷ்ணவதேவி கட்ரா - திருநெல்வேலி விரைவு ரயிலில் தனிப்படையினா் சோதனை நடத்தினா். அப்போது முன்பக்க முன்பதிவில்லா பொதுப் பெட்டியில் கேட்பாரற்று கிடந்த டிராவல் பேக்கில் சோதனையிட்டதில், 3 பண்டல்களில் 6 கிலோ கஞ்சா இருந்தது தெரியவந்தது. அதனைக் கடத்தி வந்தவா் போலீஸாரை பாா்த்தும் பையைப் போட்டுவிட்டுத் தப்பியது தெரியவந்தது. இதையடுத்து பறிமுதல் செய்யப்பட்ட 19 கிலோ கஞ்சாவையும் ரயில்வே போலீஸாரிடம் தனிப்படையினா் ஒப்படைத்தனா்.