சேலத்தில் ஆத்தூா் வழியாக பகல் நேரத்தில் பயணிகள் ரயில் இயக்க கோரிக்கை

சேலத்தில் இருந்து ஆத்தூா் வழியாக பகல் நேரத்தில் பயணிகள் ரயில் இயக்க ரயில்வே அமைச்சகத்திடம் கோரிக்கை வைக்க உள்ளதாக பாரதிய ஜனதா கட்சி மாநில துணைத் தலைவா் கே.பி.ராமலிங்கம் தெரிவித்தாா்.

சேலம் ரயில்வே கோட்டத்துக்கு உள்பட்ட பகுதிகளில் நடைபெற்று வரும் வளா்ச்சிப் பணிகள் மற்றும் மேற்கொள்ள வேண்டிய திட்டங்கள், பொதுமக்களின் கோரிக்கைகள் குறித்து பாஜக மாநில துணைத் தலைவரும், முன்னாள் எம்.பி.யுமான கே.பி.ராமலிங்கம் சேலம் ரயில்வே கோட்ட மேலாளா் பன்னா லாலை புதன்கிழமை சந்தித்து கோரிக்கை மனு அளித்தாா்.

தொடா்ந்து, ரயில்வே கோட்ட கூடுதல் மேலாளா் சரவணன் மற்றும் அலுவலா்களிடம் கலந்துரையாடிய அவா் செய்தியாளா்களிடம் கூறியது:

சேலம்-கரூா்-திண்டுக்கல் ரயில் வழிப்பாதையை இரட்டைப் பாதையாக மாற்றுவதற்காக ரூ. 2,241 கோடி மத்திய அரசு ஒதுக்கீடு செய்துள்ளது. இதன்மூலம் தென் மாவட்டங்கள், தொழில் நகரங்களான நாமக்கல், சேலம் மற்றும் பெங்களூருடன் இரட்டை வழிப் பாதையாக இணைக்கப்படும். மேலும், ரயில்களின் காத்திருப்பு நேரம் குறைந்து கூடுதல்கள் ரயில்கள் இயக்க வாய்ப்புள்ளது.

சமூக நல்லிணக்கம், வலிமையான பாரதம் ஆகியவற்றை மையப்படுத்தி சேலம் கோட்டத்தில் ரயில் நிலையங்களை நவீனப்படுத்துவதில் மத்திய அரசு கவனம் செலுத்தி வருகிறது.

வரலாற்றுச் சிறப்புமிக்க சங்ககிரி துா்க் ரயில் நிலையத்தை இதுபோன்று நவீனப்படுத்த வேண்டும் என பிரதமரிடம் கோரிக்கை அளிக்க உள்ளேன். மேலும், சேலத்தில் இருந்து சென்னைக்கு இரவில் இயக்கப்படும் விரைவு ரயிலை கரூா் வரை இயக்க நடவடிக்கை எடுக்க வேண்டும் என்ற கோரிக்கையும், பகல் நேரத்தில் சேலத்தில் இருந்து ஆத்தூா் வழியாக சென்னைக்கு புதிய ரயில், சேலம் - புதுச்சேரிக்கு ரயில் இயக்க வேண்டும் என்பன உள்ளிட்ட கோரிக்கைகளும் பிரதமா் மற்றும் ரயில்வே துறை அமைச்சரிடம் தெரிவிக்கப்பட உள்ளது.

மேட்டூா் ரயில் நிலையப் பகுதியில் உள்ள சக்தி காளியம்மன் கோயில் வளாகம் குறித்து ரயில்வே நிா்வாகம் நோட்டீஸ் வழங்கியுள்ள நிலையில், அதுகுறித்தும் சேலம் ரயில்வே கோட்ட அதிகாரிகளிடம் கோரிக்கை வைக்கப்பட்டுள்ளது என்றாா்.