விவசாய நில பதிவுச் சிக்கலைத் தீா்க்க நடவடிக்கை: பத்திரப் பதிவுத் துறை அமைச்சா்

விவசாய நிலங்களை பதிவு செய்வதில் உள்ள சிக்கல் குறித்து முதல்வருடன் பேசி நல்ல முடிவு எடுக்கப்படும் என்று பத்திரப் பதிவுத் துறை அமைச்சா் டி. லோகேஷ் தமிழ்ச்செல்வன் தெரிவித்தாா்.

சேலம் விமான நிலையத்தில் ஞாயிற்றுக்கிழமை அவா் செய்தியாளா்களிடம் கூறியதாவது:

பதிவுத் துறையில் இடைத்தரா்களுக்கு இடமில்லை. பொதுமக்கள் யாரும் வேலை விரைவாக முடிய வேண்டும் என்பதற்காக இடைத்தரகா்களை நாட வேண்டாம். பதிவாளா்கள் புரோக்கா்களை ஊக்குவிக்கக் கூடாது என கண்டிப்பான உத்தரவு பிறப்பிக்கப்பட்டுள்ளது.

பொதுமக்கள் நேரடியாக அதிகாரிகளை அணுகலாம். மேலும், 5 மற்றும் 10 சென்ட் விவசாய நிலங்களை பதிவு செய்வதில் உள்ள ‘பிரிவு 22-ஏ’ சிக்கல் குறித்து முதல்வருடன் பேசி, விவசாயிகளின் நலன்காக்கும் வகையில் உரிய சட்ட நடவடிக்கை எடுக்கப்படும். வாடகைக் கட்டடத்தில் இயங்கும் பத்திரப் பதிவு அலுவலகங்கள் விரைவில் சொந்த கட்டடங்களுக்கு மாற்றப்படும் என்றாா் அவா்.