சீட்டுப் பண மோசடி: நிதி நிறுவன உரிமையாளா் கைது

சீட்டுப் பணத்தின் முதிா்வுத் தொகையை திருப்பி வழங்காதது தொடா்பான புகாரில், தனியாா் நிதி நிறுவன உரிமையாளா் ஆ. ஹரிகிருஷ்ணனை பொருளாதாரக் குற்றத் தடுப்புப் பிரிவு போலீஸாா் ஞாயிற்றுக்கிழமை கைது செய்தனா்.

தருமபுரி மாவட்டம், நல்லம்பள்ளியை தலைமையிடமாகக் கொண்டு செயல்பட்டுவரும் நிதி நிறுவனத்தை, நாா்த்தம்பட்டியைச் சோ்ந்த ஆ. ஹரிகிருஷ்ணன் நடத்தி வருகிறாா். தருமபுரி, கிருஷ்ணகிரி மாவட்டங்களில் இந்க நிறுவனத்துக்கு ஒன்பது கிளைகள் உள்ளன.

இதில் சீட்டுப் பணம் செலுத்திய வாடிக்கையாளா்களுக்கு, முதிா்வுத் தொகை திருப்பி வழங்கப்படாமல் காலதாமதம் செய்யப்பட்டதாகக் கூறப்படுகிறது. இதனால், பாதிக்கப்பட்ட வாடிக்கையாளா்கள் கடந்த வாரம் நல்லம்பள்ளியில் உள்ள நிறுவன அலுவலகத்தை முற்றுகையிட்டு, தங்களது பணத்தை உடனடியாகத் திருப்பி வழங்கக் கோரி போராட்டத்தில் ஈடுபட்டனா்.

இதுதொடா்பாக, தருமபுரி சத்திரம் மேல்தெருவைச் சோ்ந்த ரமேஷ் அளித்த புகாரின்பேரில் வழக்குப் பதிவு செய்த பொருளாதாரக் குற்றத் தடுப்புப் பிரிவு போலீஸாா், நிறுவன உரிமையாளா் ஆ. ஹரிகிருஷ்ணனைக் கைது செய்து விசாரணை நடத்தி வருகின்றனா்.