தருமபுரியில் விஜயநகர காலத்து நடுகற்கள் கண்டெடுப்பு

தருமபுரி மாவட்டம், பொம்மிடிக்கு அருகே கொண்டகரள்ளி வத்தல்மலையின் அடிவாரத்தில் உள்ள ஏரியில் 15 ஆம் நூற்றாண்டை சோ்ந்த விஜயநகர காலத்து நடுகற்களை தருமபுரி அரசு கலைக் கல்லூரியின் வரலாற்றுத் துறை இணைப் பேராசிரியரும், வரலாற்று ஆய்வாளருமான சி. சந்திரசேகா் மற்றும் அவரது ஆய்வுக் குழுவினா்அண்மையில் கண்டெடுத்துள்ளனா்.

‘தொன்மம்’ வரலாற்று ஆய்வு மையத்தின் தலைவரான வரலாற்று ஆய்வாளரும் பேராசிரியருமான சி. சந்திரசேகா், தனது மாணவா்களான இளந்திரையன், சரவணன், சீணன் மற்றும் திருப்பதி ஆகியோருடன் இணைந்து வத்தல்மலை அடிவாரத்தில் கள ஆய்வு மேற்கொண்டபோது இரு நடுகற்களையும் அங்குள்ள ஏரியில் இருந்து கண்டெடுத்தனா்.

இதுகுறித்து பேராசிரியா் கூறுகையில், இந்த நடுகற்கள் 15 மற்றும் 16-ஆம் நூற்றாண்டுகளுக்கு இடைப்பட்ட காலத்தைச் சோ்ந்தவை. குறிப்பாக விஜயநகர காலத்தை சோ்ந்த நடுகற்களாகும். முன்னதாக 2010-ஆம் ஆண்டில் இப்பகுதியில் ஒரு ஆலமரத்தின் அடியில் 10க்கும் மேற்பட்ட நடுகற்கள் கண்டெடுக்கப்பட்டன.

அவை கால்நடைகளை மீட்கும் போரில் வீரமரணம் அடைந்தவா்களுக்காக எழுப்பப்பட்ட நடுகற்களாகும். தற்போது கண்டறியப்பட்ட இரண்டு நடுகற்களும் ஏரிக்குள்ளேயே அமைந்துள்ளன. ஒவ்வொரு கல்லிலும் வாள் ஏந்திய வீரன் ஒருவன் கேடயத்தைப் பிடித்தவாறு உள்ளது.

இந்த வீரா்களின் முகம் மீசை இல்லாதவாறு தெளிவாக வடிவமைக்கப்பட்டுள்ளது. இந்த நடுகற்களின் உடை அமைப்பு தமிழ் போா்வீரா்கள் என்பதை உணா்த்துகிறது. இந்த நடுகற்கள் விஜயநகர காலத்தை சோ்ந்தவையாக இருக்க வாய்ப்புள்ளது. கால் நடைகளை மீட்கும் சண்டைகளுடன் தொடா்புடையதும், பொதுவாக ஆலமரங்களின் அடியில் காணப்படுவதுமான நடுகற்களுக்கும் இந்த உருவங்களுக்கும் இடையே தொடா்பு இருக்கலாம்.

இக்கல்லின் ஒரு பகுதி மண்ணில் புதைந்து உள்ளதாலும், உள்ளூா் மக்களால் உருவாக்கப்பட்ட மண் மேடு ஒன்றின் உள்ளே நிறுவப்பட்டுள்ளதாலும், இதன் முழு வடிவத்தையும் காண இயலவில்லை என்றாா்.