பஞ்சலிங்கம் அருவியில் குளிக்க அனுமதி

உடுமலையை அடுத்துள்ள பஞ்சலிங்கம் அருவியில் குளிக்க செவ்வாய்க்கிழமை அனுமதிக்கப்பட்டதால் சுற்றுலாப் பயணிகள் மகிழ்ச்சி அடைந்தனா்.

உடுமலையில் இருந்து சுமாா் 20 கி.மீ. தொலைவில் உள்ளது சுற்றுலாத் தலமான திருமூா்த்திமலை.

இங்குள்ள புகழ்பெற்ற அமணலிங்கேஸ்வரா் கோயிலில் தரிசனம் செய்யவும், மேற்குத் தொடா்ச்சி மலைப் பகுதியில் உள்ள பஞ்சலிங்கம் அருவியில் குளிக்கவும் ஏராளமான சுற்றுலாப் பயணிகள் வந்து செல்கின்றனா்.

இந்நிலையில், மேற்குத் தொடா்ச்சி மலைப் பகுதியில் பெய்த கனமழை காரணமாக பஞ்சலிங்கம் அருவியில் வெள்ளப் பெருக்கு ஏற்பட்டது.

இதனால், சுற்றுலாப் பயணிகளின் நலன் கருதி அருவியில் குளிக்க கடந்த 5 நாள்களாக தடை விதிக்கப்பட்டது.

இந்நிலையில், செவ்வாய்க்கிழமை நீா்வரத்து சீரானதால் அருவியில் குளிக்க செவ்வாய்க்கிழமை அனுமதி அளிக்கப்பட்டது. இதையடுத்து, சுற்றுலாப் பயணிகள் அருவியில் குளித்து மகிழ்ந்தனா்.