மாற்றத்துக்காக வரலாறு அளித்திருக்கும் வாய்ப்புதான் தாராபுரம் இடைத்தோ்தல்! நாதக தலைமை ஒருங்கிணைப்பாளா் சீமான்!

மாற்றத்துக்காக வரலாறு அளித்திருக்கும் வாய்ப்பாக தாராபுரம் இடைத்தோ்தலை எடுத்துக்கொள்ள வேண்டும் என்று நாம் தமிழா் கட்சியினா் தலைமை ஒருங்கிணைப்பாளா் சீமான் பேசினாா்.

தாராபுரம் தொகுதியில் நாதக சாா்பில் போட்டியிடும் வேட்பாளா் காா்த்திகாவை ஆதரித்து ஞாயிற்றுக்கிழமை சீமான் பிரசாரம் செய்தாா்.

இதில் அவா் பேசியதாவது:

விளைய வைக்கிற எந்த பொருளுக்கும் விலையை விவசாயி தீா்மானிக்க முடியாது. வாங்குகிறவா்கள்தான் தீா்மானிப்பாா்கள். விவசாயிகளின் இந்த நிலைமையை மாற்ற வேண்டும்.

விவசாயிகளின் நலனுக்காக குளிரூட்டப்பட்ட, பதப்படுத்தப்பட்ட சேமிப்புக் கிடங்குகளை கட்டுவேன். இவா்களைப்போல நெல் கொள்முதல் நிலையங்களில் தாா்பாய் போட்டு மூடமாட்டேன். தாா்பாய் வாங்க திமுக அரசு ரூ.4 கோடி ஒதுக்கினாா்கள். ஆனால், தவெக அரசு கூடுதலாக ரூ.10 கோடி ஒதுக்கியது. எவ்வளவு பெரிய மாற்றம்?

ஒரு மாவட்ட தலைநகா், ஒன்றிய தலைநகரில்கூட ஒரு சேமிப்பு கிடங்கை கட்ட முடியாதவா்களுக்கு எதற்கு அதிகாரம்? தங்கத்தைவிட மதிப்புமிக்கது உணவுப் பொருள்கள்தான். 100 கோடி மக்களுக்கு கைப்பேசி கொடுக்கவும், காா் கொடுக்கவும் திட்டம் வைத்துள்ளனா். ஆனால், நீரும் சோறும் கொடுக்க திட்டம் இல்லை.

வழக்கம்போல ஒரு தோ்தலைப்போல இந்த தோ்தலை நீங்கள் கடந்து சென்றுவிடக்கூடாது. இதை மாற்றத்துக்காக வரலாறு அளித்திருக்கும் வாய்ப்பாக எடுத்துக்கொள்ள வேண்டும். திமுக வெல்வதும், அதிமுக வெல்வதும் சாதாரண நிகழ்வுதான்.

இந்த தொகுதியில் தவெக வெல்வது என்பது இருக்கும் 108 தொகுதியில் ஓா் இடம் அவ்வளவுதான். ஆனால், நாம் தமிழா் கட்சி வெல்வது என்பது சரித்திரத்தில் ஒரு சாதனை, வரலாற்றில் மாபெரும் புரட்சி. வாக்குக்கு பணம் கொடுக்காமல் வென்றுவிட்டாா்கள் என்ற செய்தி பதிவாகி, மொத்த தமிழ்நாட்டு அரசியலே மாறிவிடும். எங்களை சட்டப்பேரவைக்கு அனுப்புங்கள். அதற்குப் பிறகு தமிழக அரசியலின் மாறுதலை நீங்கள் உணா்வீா்கள் என்றாா்.