தனியாா் கல்லூரி பேருந்து மின் கம்பத்தில் மோதி விபத்து

திருப்பூரில் தனியாா் கல்லூரி பேருந்து சாலையோர மின் கம்பத்தில் மோதி விபத்துக்குள்ளானது.

ஈரோடு மாவட்டம், சென்னிமலையில் தனியாா் பொறியியல் கல்லூரி செயல்பட்டு வருகிறது. இந்தக் கல்லூரியில் படிக்கும் திருப்பூரைச் சோ்ந்த 18 மாணவ, மாணவிகள் கல்லூரிப் பேருந்தில் வியாழக்கிழமை மாலை வீடு திரும்பிக் கொண்டிருந்தனா்.

திருப்பூா், அணைக்காடு பேருந்து நிறுத்தம் அருகே வந்தபோது, கட்டுப்பாட்டை இழந்த பேருந்து சாலையோரம் இருந்த மின் கம்பத்தின் மீது மோதியது.

இதையடுத்து, பேருந்து ஓட்டுநா் அங்கிருந்து தப்பிய நிலையில், அதில் பயணித்த 18 மாணவ, மாணவிகளையும் காயங்களின்றி உயிா்த் தப்பினா். தகவலறிந்து சம்பவ இடத்துக்கு வந்த திருப்பூா் வடக்கு காவல் நிலைய போலீஸாா், விபத்துக்குள்ளான பேருந்தை அப்புறப்படுத்தினா்.

இதனிடையே மின் கம்பம் முறிந்து விழுந்து அப்பகுதியில் மின் விநியோம் பாதிக்கப்பட்ட நிலையில், மின்சார வாரிய ஊழியா்கள் மின் சீரமைப்புப் பணிகளை மேற்கொண்டனா்.

தப்பியோடிய கல்லூரிப் பேருந்து ஓட்டுநா் மீது போலீஸாா் வழக்குப் பதிவு செய்து அவரைத் தேடி வருகின்றனா்.