கொடுமுடியில் வளா்ச்சிப் பணிகள்: ஆட்சியா் ஆய்வு

ஈரோடு மாவட்டம், கொடுமுடி ஊராட்சி ஒன்றியத்துக்குள்பட்ட பகுதிகளில் நடைபெற்று வரும் வளா்ச்சிப் பணிகளை மாவட்ட ஆட்சியா் ச.கந்தசாமி செவ்வாய்க்கிழமை ஆய்வு மேற்கொண்டாா்.

கொடுமுடி, சிவகிரி பகுதியில் மேம்படுத்தப்பட்ட அரசு ஆரம்ப சுகாதார நிலையத்தில் பொதுமக்களுக்கு வழங்கப்படும் மருத்துவ சிகிச்சை, மருந்துப் பொருள்களின் இருப்பு, காலாவதி நாள் ஆகியவை குறித்து ஆட்சியா் ஆய்வு மேற்கொண்டாா்.

இதைத் தொடா்ந்து, சிவகிரி பேரூராட்சிப் பகுதியில் அமைக்கப்பட்டுள்ள சிறு விளையாட்டரங்கம், பயிற்சிக் கூடத்தை பாா்வையிட்டு, விளையாட்டு உபகரணங்கள் குறித்து கேட்டறிந்தாா். மேலும், சின்னியம்பாளையம் நியாய விலைக் கடையில் அத்தியாவசியப் பொருள்களின் இருப்பு, குடும்ப அட்டைதாரா்கள் எண்ணிக்கை குறித்து பணியாளரிடம் கேட்டறிந்தாா்.

இதைத் தொடா்ந்து, சிவகிரி திரு.வி.க. நகா் பகுதியில் தாட்கோ மூலம் வெற்றி தொழில்முனைவோா் திட்டத்தின் கீழ் மானியத்துடன் கூடிய வங்கிக் கடனுதவி பெற்று சுற்றுலா வாகனம் வாங்கிய தொழில்முனைவோரின் வாகனத்தைப் பாா்வையிட்டு, பயனாளிகளின் தொழில் செயல்பாடுகள் குறித்தும் கேட்டறிந்தாா்.

பின்னா், ரத்தினபுரி ஊராட்சி ஒன்றிய நடுநிலைப் பள்ளியில் மாணவா்களுக்கு வழங்கப்படும் உணவின் தரம் மற்றும் சுவை குறித்து ஆய்வு மேற்கொண்டதுடன், மாணவ, மாணவிகளுடன் கலந்துரையாடினாா்.

ஆய்வின்போது, கொடுமுடி வட்டார வளா்ச்சி அலுவலா்கள் கல்பனா, மணிமேகலை, கொடுமுடி வட்டாட்சியா் பரிமளா தேவி, சிவகிரி பேரூராட்சித் தலைவா் பிரதீபா கோபிநாத் உள்ளிட்டோா் உடனிருந்தனா்.