ராஜன் நகா் தரைப்பாலத்தை மூழ்கடித்த வெள்ளம்

ராஜன் நகா் தரைப்பாலத்தை மூழ்கடித்தபடி வெள்ளம் பெருக்கெடுத்து ஓடியதால் புதுக்குய்யனூா் மற்றும் ராஜன் நகா் இடையே ஞாயிற்றுக்கிழமை போக்குவரத்து துண்டிக்கப்பட்டது.

ஈரோடு மாவட்டம், சத்தியமங்கலத்தை அடுத்த பவானிசாகா் சுற்றுவட்டாரப் பகுதியில் ஞாயிற்றுக்கிழமை கனமழை பெய்தது. பவானிசாகா், கொத்தமங்கலம், நால்ரோடு உள்ளிட்ட பகுதியில் சுமாா் ஒரு மணி நேரத்துக்கு மேலாக பெய்த கனமழையால் சாலைகளில் மழைநீா் பெருக்கெடுத்து ஓடியது.

இதில் ராஜன் நகா் தரைப்பாலத்தை மூழ்கடித்தபடி வெள்ளம் சென்றால் ராஜன் நகா் மற்றும் புதுகுய்யனூா் இடையே போக்குவரத்து பாதிக்கப்பட்டது. நால்ரோடு பகுதியில் பெய்த கனமழை காரணமாக அங்குள்ள குடியிருப்புப் பகுதிக்குள் மழைநீா் புகுந்தது. மேலும் வடிகாலில் ஏற்பட்ட அடைப்பு காரணமாக சாலையில் பெருக்கெடுத்து ஓடிய மழைநீருடன் கழிவுநீரும் கலந்தது. இதனால் அப்பகுதியில் துா்நாற்றம் வீசியது.